गण्डकी विकास बैङ्क : कम्पनी विश्लेषण (बुधवार, ५ मङ्सिर २०७५)

आर्थिक अभियान

नेपाल राष्ट्र बैङ्कबाट ‘ख’वर्गको इजाजत प्राप्त यस कम्पनीले चालू आवको पहिलो त्रैमासमा रू. १० करोड २७ लाख नाफा कमाएको छ । यो नाफा गत आवको तुलनामा ९० प्रतिशतले वृद्धि भएको हो । गत आवको सोही अवधिमा कम्पनीले रू. ५ करोड ३९ लाख कमाएको थियो । चालू आवको पहिलो त्रैमासमा कम्पनीले रू. ७९ लाख ३८ हजार खराब कर्जा उठाउन सफल भएको र खुद ब्याज आम्दानी तथा सञ्चालन नाफा बढेकाले नाफामा वृद्धि भएको हो । सोही अवधिमा कम्पनीको चुक्तापूँजी ४९ प्रतिशतले बढेर रू. २ अर्ब ७५ करोड पुगेको छ । कम्पनीले १९ दशमलव ३१ प्रतिशत बोनस शेयर वितरण गनेरपछि पूँजीवृद्धि भएको हो । रिजर्भ कोषमा रू. १ अर्ब ११ करोड छुट्याएको कम्पनीले हाल ७७ ओटा शाखा कार्यालयमार्फत बैङ्किङ सेवा दिँदै आएको छ । साथै, कम्पनीले २०७४/७५ को नाफाबाट १४ दशमलव २० प्रतिशत नगद लाभांश वितरण गर्ने प्रस्ताव गरेको छ । कम्पनीको मङ्सिर ३ गते बसेको सञ्चालक समिति बैठकले नगद लाभांश वितरण गर्ने प्रस्ताव गरेको हो । यो लाभांश नेपाल राष्ट्र बैङ्कबाट स्वीकृत भई कम्पनीको आगामी ११औं वार्षिक साधारणसभाले पारित गरेपछि शेयरधनीले पाउनेछन् ।

कम्पनीको चालू आवको पहिलो त्रैमासिक वित्तीय विवरणअनुसार आव २०७५/७६ र २०७४/७५ बीच तुलना गर्दा :

• चालू आवको पहिलो त्रैमाससम्ममा कम्पनीले रू. २३ अर्ब ७२ करोड निक्षेप सङ्कलन गरेको छ भने रू. २१ अर्ब २४ करोड कर्जा प्रवाह गरेको छ । गत आवको सोही अवधिको तुलनामा निक्षेप २२ प्रतिशत र कर्जा प्रवाह २८ प्रतिशतले वृद्धि भएको हो । पहिलो त्रैमासमा कम्पनीको लगानी रू. ६३ करोड ६६ लाख रहेको छ ।
• कम्पनीको खुद ब्याज आम्दानी रू. २३ करोड ३६ लाख, कर्मचारी खर्च रू. ८ करोड ३२ लाख, अन्य सञ्चालन खर्च रू. ४ करोड २२ लाख र सञ्चालन नाफा रू. १५ करोड ३० लाख रहेको छ । गत आवको पहिलो त्रैमासको तुलनामा खुद ब्याज आम्दानी १६ प्रतिशत र सञ्चालन नाफा ८२ प्रतिशतले बढेको छ ।
• कम्पनीको स्थिर सम्पत्ति ५० प्रतिशतले बढेर रू. ३५ करोड ७५ लाख पुगेको छ भने अन्य सम्पत्ति रू. ४४ करोड ७४ लाख रहेको छ । सम्भावित जोखिमबापतको व्यवस्थापनमा रू. १ करोड ४७ लाख छुट्याएको छ भने निष्क्रिय कर्जा शून्य दशमलव ४६ प्रतिशत रहेको छ । पूँजीकोष लागत ८ दशमलव ८७ प्रतिशत र पूँजीकोष पर्याप्तता २० दशमलव ३० प्रतिशत रहेको छ ।
• पहिलो त्रैमासिक वित्तीय विवरणअनुसार कम्पनीको प्रतिशेयर आम्दानी (वार्षिक) रू. १४ दशमलव ९५ प्रतिशत र मूल्य आम्दानी अनुपात १३ दशमलव ५१, तरलता अनुपात २६ दशमलव ७१ प्रतिशत र प्रतिशेयर नेटवर्थ रू. १ सय ४० दशमलव ६३ रहेको छ । कम्पनीको मङ्गलवारको शेयरमूल्य रू. १ सय ९९ कायम भएको छ ।
• अर्निङ पावर रेशियो : कर तिरेपछिको नाफा/कुल सम्पत्ति

• अर्निङ इल्ड रेशियो : प्रतिशेयर आम्दानी/प्रतिशेयर बजार मूल्य× १००

• खरीद चाप : कम्पनीको मङ्गलवार भएको शेयर कारोबारको अन्तिम समयसम्ममा विक्री चापको तुलनामा खरीद चाप बढी भएको छ । सो अवधिसम्म १३ हजार ६ सय ९ कित्ता शेयर खरीद र ८ हजार ५ सय ६७ कित्ता शेयर विक्री गर्ने माग रहेको थियो ।

निष्कर्ष कम्पनीको ५८ दिनको कारोबार अवधिको अन्तिम टुप्पी भएको सेतो मारुबोजु आकृति बनेको छ । यस्तो आकृतिले कम्पनीको शेयरमूल्य बढ्ने सङ्केत देखाउँछ । आरएसआई न्युट्रल जोन ४७ दशमलव ०१ विन्दुमा छ । यसले शेयर खरीदविक्री चाप सन्तुलनमा रहेको देखाउँछ । कम्पनीको स्ट्याण्डर्ड डेभिएशन २ दशमलव ०५ विन्दुमा छ । उतारचढाव न्यून रहेको छ । यस्तो अवस्थामा कम जोखिम हुन्छ भने प्रतिफल पनि कम हुने गर्दछ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग नजिकिएका छन् । हालको मूल्य यी दुई रेखाभन्दा तल छ । मङ्गलवार शेयर मूल्य रू. १ सय ९९ देखि बजारको अवस्था परिवर्तन भई मूल्य महँगिएमा रू. २ सय ४ मा प्रतिरोध पाउने र मूल्य सस्तिएमा रू. १ सय ९५ मा टेवा पाउने देखिन्छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस