राष्ट्रिय बीमा कम्पनी : कम्पनी विश्लेषण (आइतवार, ९ मङ्सिर २०७५)

Nov 25, 2018

लगानी कम्पनी विश्लेषण

आर्थिक अभियान राष्ट्रिय बीमा कम्पनीले २०७१ साउन १८ गतेदेखि निर्जीवन बीमा व्यवसाय गर्दै आएको छ । सरकारी स्वामित्वमा रहेको राष्ट्रिय बीमा संस्थान कम्पनीमा परिणत हुन सक्ने प्रावधानअन्तर्गत निर्जीवन बीमा व्यवसायलाई संस्थानबाट अलग गरी छुट्टै सञ्चालन गर्दै आएको हो । आव २०७५/७६ चलिरहँदा कम्पनीले साविकको राष्ट्रिय बीमा संस्थान निर्जीवन बीमा विभागको आव २०६३/६४ देखि २०६७/६८ सम्मको वार्षिक साधारणसभा असोज १९ गते सम्पन्न गरेको छ । आव २०६८/६९ को मुनाफाबाट १२० प्रतिशत बोनस वितरण गर्ने प्रस्ताव गरेको कम्पनीले बीमा समितिले स्वीकृत नगर्दा अघिल्लो वर्षसम्मको मात्र साधारणसभा गरेको हो । लगानीकर्ताको चर्को आलोचनापछि कम्पनीका अध्यक्ष उमेशचन्द्र उपाध्यायले आगामी ६ महीनाभित्र संस्थानतर्फको बाँकीसहित कम्पनीतर्फको पहिलो वार्षिक साधारणसभा सम्पन्न गर्ने प्रतिबद्धता व्यक्त गरेका छन् । समितिबाट वित्तीय विवरण स्वीकृतिपछि आगामी साधारणसभामा सोही प्रस्तावलाई पेश गर्ने कम्पनीको योजना छ । यसअघि कम्पनीले आव २०६०/६१ देखि २०६२/६३ सम्मको मुनाफाबाट १ सय १४ दशमलव २७ प्रतिशत बोनस शेयर वितरण गरेको थियो । बीमा समितिको निर्देशनमा रू. १ अर्ब चुक्तापूँजी पुर्‍याउनुपर्ने कम्पनीको हाल रू. २६ करोड ६६ लाख ३९ हजार रहेको छ ।

कम्पनीले सार्वजनिक गरेको पहिलो त्रैमासिक वित्तीय विवरणअनुसार आव २०७५/७६ र २०७४/७५ बीच तुलना गर्दा : वित्तीय विवरणमा उल्लेख गरिएका विवरणहरू राष्ट्रिय बीमा संस्थान तथा कम्पनीको आव २०७०/७१ को वार्षिक साधारणसभा तथा कम्पनीको बाह्य लेखा परीक्षण तथा नियामक निकायको निर्देशनपछि हेरफेर हुनेछ ।

कम्पनीले चालू आवको पहिलो त्रैमासमा रू. ५ करोड ८ लाख ४६ हजार खुद नाफा आर्जन गरेको छ । यो नाफा गत वर्षको तुलनामा करीब ६ प्रतिशत बढी हो । गत वर्ष कम्पनीले रू. ४ करोड ८० लाख १६ हजार खुद नाफा गरेको थियो ।
यस त्रैमासमा गत वर्षभन्दा आम्दानी ७ प्रतिशतले कम रू. १० करोड ८३ लाख ३९ हजार र खर्च पनि १६ प्रतिशत कम रू. ५ करोड ७४ लाख ९३ हजार भएको छ ।
कम्पनीले गत वर्षभन्दा १२ प्रतिशत कम कुल बीमाशुल्क आर्जन गरेको छ । गत वर्ष रू. ३६ करोड ३५ लाख ३९ हजार कुल बीमाशुल्क आर्जन गरेको कम्पनीले यस वर्ष रू. ३१ करोड ९६ लाख ८५ हजार गरेको छ ।
पहिलो त्रैमाससम्ममा गत वर्षभन्दा करीब ७ प्रतिशत बढी रू. २ अर्ब ९ करोड ६० लाख ७७ हजार जगेडा कोष रकम रहेको छ भने २५ प्रतिशत बढी रू. १ खर्ब ३७ करोड ७७ लाख ४६ हजार बीमा कोष रहेको छ ।
पहिलो त्रैमासमा ३ हजार ९ सय ९९ बीमालेख जारी गरेको कम्पनीले ५ सय ६३ बीमालेख नवीकरण गरेको छ । यस त्रैमासमा गत त्रैमासभन्दा ७३ प्रतिशत कम रू. २ करोड २९ लाख ७० हजार ६५ जनालाई दाबी भुक्तानी गरेको छ । गत वर्ष कम्पनीले ५ सय ९१ जनालाई रू. ८ करोड ५० लाख ८८ हजार दाबी भुक्तानी गरेको थियो ।
पहिलो त्रैमासको वित्तीय विवरणअनुसार कम्पनीको प्रतिशेयर आम्दानी वार्षिक रू. ७६ दशमव २८, मूल्य आम्दानी अनुपात ५ सय २२ दशमलव ७५ गुणा, प्रतिशेयर कुल सम्पत्तिको मूल्य रू. १ हजार ४ सय २ दशमलव ८२ र प्रतिशेयर नेटवर्र्थ रू. ८ सय ८६ दशमलव ११ रहेको छ । कम्पनीको तरलता अनुपात २ दशमलव ७८ प्रतिशत छ । कम्पनीको बिहीवार शेयर मूल्य रू. ९ हजार ६ सय ९० कायम भएको छ ।
डिभिडेण्ड इल्ड रेसियो : प्रतिशेयर लाभांश (गत वर्ष)/प्रति शेयर बजार मूल्य×१००

अर्निङ पावर रेशियो : कर तिरेपछिको नाफा/कुल सम्पत्ति

अर्निङ इल्ड रेशियो : प्रतिशेयर आम्दानी/प्रतिशेयर बजार मूल्य× १००
विक्री चाप : कम्पनीको बिहीवार भएको शेयर कारोबारको अन्तिम समयसम्म खरीद चापको तुलनामा विक्री चाप बढी रहेको थियो । सो अवधिसम्म ८६ कित्ता शेयर खरीद माग रहेको थियो भने १ सय २० कित्ता शेयर विक्री गर्ने माग रहेको थियो ।

निष्कर्ष कम्पनीको ५७ दिनको शेयर कारोबारलाई लिएर गरिएको मैनबत्ती विश्लेषणमा सेतो मैनबत्ती आकृति बनेको छ । यस्तो आकृतिले कम्पनीको शेयरमूल्य आगामी दिनमा बढ्ने सङ्केत गर्दछ । सोही अवधिको कारोबारमा आरएसआई न्युट्रल जोन ४९ दशमलव ६४ स्केलमा छ । यसले शेयर खरीदविक्री चाप सन्तुलनमा रहेको देखाउँछ । कम्पनीको ट्याण्डर्ड डेभिएशन ७९ दशमलव ६४ विन्दुमा छ । यसले उतारचढाव सामान्य रहेको देखाउँछ । कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग नजिकिएका छन् । हालको मूल्य यी दुवै रेखाभन्दा माथि छ । बिहीवारको शेयर मूल्य रू. ९ हजार ६ सय ९० देखि बजारको अवस्था परिवर्तन भई मूल्य महँगिएमा रू. १० हजार ५० मा प्रतिरोध र मूल्य सस्तिएमा रू. ९ हजार ५ सयमा टेवा पाउने देखिन्छ ।