बैङ्क अफ काठमाण्डू : कम्पनी विश्लेषण (बुधवार, १२ मङ्सिर २०७५)

Nov 28, 2018

लगानी कम्पनी विश्लेषण

आर्थिक अभियान नेपाल राष्ट्र बैङ्कको निर्देशनअनुसार पूँजीवृद्धिका लागि लुम्बिनी विकास बैङ्कसँग गाभिएर एकीकृत कारोबार गरिरहेको यस कम्पनीको चालू आर्थिक वर्ष (आव) २०७५/७६ को पहिलो त्रैमासको वित्तीय विवरणलाई आधार मान्दा तोकेबमोजिम चुक्तापूँजी अझै पुगेको देखिँदैन । पहिलो त्रैमाससम्ममा कम्पनीको चुक्तापूँजी रू. ७ अर्ब ७ करोड २८ लाख ९६ हजार रहेको छ । कम्पनीले संस्थापकतर्फको स्वामित्व ५१ प्रतिशत कायम गर्न ६१ लाख ५८ हजार ६७ कित्ता संस्थापक शेयर गत वर्ष मङ्सिर २२ देखि २९ गतेसम्म बोलकबोल प्रक्रियाबाट आवेदन माग गरी पुस १३ गते बाँडफाँट गरेको थियो । बोलकबोलमार्फत विक्री गरिएको उक्त शेयर सञ्चालक समितिले निर्णय गरी चुक्तापूँजीमा लेखाङ्कन गरेको कम्पनीको भनाइ छ । राष्ट्र बैङ्कले बोलकबोलबाट प्राप्त प्रिमियम रू. ९२ करोड ९९ लाख २६ हजारलाई समेत चुक्तापूँजीसरह मान्यता दिएकाले लेखाङ्कनपछि तोकेबमोजिम चुक्तापूँजी पुग्ने कम्पनीले बताएको छ । हाल केन्द्रीय कार्यालयसहित ८५ शाखा कार्यालयबाट सेवा प्रदान गरिरहेको यस कम्पनीले आगामी दिनमा १ सयभन्दा बढी शाखा विस्तार गर्ने लक्ष्य लिएको छ । शाखा विस्तार गर्दा देशमा न्यून वित्तीय पहुँच भएका स्थानलाई समेत ध्यान दिने नीति कम्पनीको छ ।

कम्पनीले सार्वजनिक गरेको चालू आवको पहिलो त्रैमासिक वित्तीय विवरणअनुसार आव २०७५/७६ र २०७४/७५ बीच तुलना गर्दा :

कम्पनीले एनएफआरएसअनुसार सार्वजनिक गरेको पहिलो त्रैमासको वित्तीय विवरणलाई आधार मान्दा गत वर्षभन्दा यस वर्ष खुद नाफामा ७२ दशमलव ६५ प्रतिशतले वृद्धि देखिएको छ । गत वर्ष पहिलो त्रैमासमा २२ करोड ४० लाख ४५ हजार खुद नाफा गरेको यस कम्पनीले यस वर्ष रू. ३८ करोड ६८ लाख २४ हजार खुद नाफा गरेको छ । गत वर्षभन्दा यस वर्ष ७५ दशमलव ६५ प्रतिशतले सञ्चालन नाफा बढेकाले नाफा बढेको देखिन्छ । यस वर्ष कम्पनीको सञ्चालन नाफा रू. ५४ करोड ७७ लाख ४४ हजार रहेको छ ।
कम्पनीको वितरणयोग्य नाफा चालू आवको पहिलो त्रैमासमा रू. २७ करोड ५६ लाख ३९ हजार रहेको छ । यो नाफा अघिल्लो वर्षको यसै समयमा रू. २२ करोड ४० लाख ४५ हजार रहेको थियो ।
जगेडा कोष रकम पनि गत वर्षभन्दा साढे ६८ प्रतिशतले बढेको छ । गत वर्ष रू. ३ अर्ब ५३ करोड ६१ लाख ८० हजार रहेको जगेडा कोष रकम यस वर्ष रू. ५ अर्ब ९६ करोड १४ लाख रहेको छ ।
पहिलो त्रैमासमा रू. ७९ अर्ब ९५ करोड ७४ लाख ४८ हजार निक्षेप सङ्कलन गरेको छ भने रू. ७१ अर्ब ८० करोड ५५ लाख ७१ हजार कर्जा प्रवाह गरेको छ । गत वर्षको तुलनामा निक्षेप सङ्कलन १४ प्रतिशत र कर्जा प्रवाह करीब १८ प्रतिशतले बढेको हो ।
कम्पनीको कुल सम्पत्ति रू. ९५ अर्ब ८० करोड १५ लाख ४९ हजार रहेको छ । कुल सम्पत्ति गत वर्षको तुलनामा १८ प्रतिशत वृद्धि देखिएको हो ।
यो वर्षको पहिलो त्रैमासमा रू. २ अर्ब ३७ करोड २४ लाख ७५ हजार ब्याज आम्दानी भएको कम्पनीको रू. १ अर्ब ४९ करोड ४५ लाख ६६ हजार ब्याजखर्च भएको छ । त्यस्तै, गत वर्षको तुलनामा खुद ब्याज आम्दानी ५३ प्रतिशतले बढेर रू. ८७ करोड ७९ लाख ९ हजार भएको छ ।
कम्पनीको पूँजीकोष पर्याप्तता यस वर्ष करीब ७ प्रतिशतले वृद्धि भई १४ दशमलव ७८ प्रतिशत पुगेको छ ।
पहिलो त्रैमासको वित्तीय विवरणअनुसार कम्पनीको प्रतिशेयर आम्दानी वार्षिक रू. २१ दशमलव ८८, मूल्य आम्दानी अनुपात वार्षिक १४ दशमलव ९५ गुणा, प्रतिशेयर नेटवर्थ रू. १ सय ८४ दशमलव २९, प्रतिशेयर कुल सम्पत्तिको मूल्य रू. १ हजार ३ सय ५४ दशमलव ४९ र तरलता अनुपात २६ दशमलव ५५ रहेको छ ।
डिभिडेण्ड इल्ड रेसियो : प्रतिशेयर लाभांश (गत वर्ष)/प्रति शेयर बजार मूल्य×१००

अर्निङ पावर रेशियो : कर तिरेपछिको नाफा/कुल सम्पत्ति

अर्निङ इल्ड रेशियो : प्रतिशेयर आम्दानी/प्रतिशेयर बजार मूल्य× १००

खरीद चाप : कम्पनीको मङ्गलवार भएको शेयर कारोबारको अन्तिम समयसम्ममा विक्री चापको तुलनामा खरीद चाप बढिरहेको छ । सो अवधिसम्म ६० हजार ३७ कित्ता शेयर खरीद र ६ हजार १ सय २६ कित्ता शेयर विक्री गर्ने माग रहेको थियो ।

निष्कर्ष कम्पनीको ५९ दिनको कारोबार अवधिको अन्तिम दिनमा इन्भर्टेड ह्याम्मर आकृति बनेको छ । यस्तो आकृतिले शेयरमूल्य बुलिस रिभर्स हुने सङ्केत देखाउँछ । विश्वसनीयता भने सामान्य रहेको छ । आरएसआई न्युट्रल जोन ३८ दशमलव ४२ विन्दुमा छ । यसले शेयर खरीदविक्री चाप सन्तुलनमा रहेको देखाउँछ । कम्पनीको स्ट्याण्डर्ड डेभिएशन २ दशमलव १९ विन्दुमा छ । उतारचढाव न्यून रहेको छ । यस्तो अवस्थामा कम जोखिम हुन्छ भने प्रतिफल पनि कम हुने गर्छ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग टाढिएका छन् । हालको मूल्य यी दुई रेखाभन्दा तल छ । हालको शेयर मूल्य रू. ३ सय ६ देखि बजारको अवस्था परिवर्तन भई मूल्य महँगिएमा रू. ३ सय १२ मा प्रतिरोध पाउने देखिन्छ ।