एनसीसी बैंक : कम्पनी विश्लेषण (बुधवार, ११ पुस २०७५)

Dec 26, 2018

लगानी कम्पनी विश्लेषण

आर्थिक अभियान नेपाल क्रेटिड एन्ड कमर्श (एनसीसी) बैंक लिमिटेडको चालू आवको पहिलो त्रैमासमा वितरणयोग्य नाफा रू. २८ करोड ४ लाख छ । यो गत आवको पहिलो त्रैमासको तुलनामा ७० प्रतिशत बढी हो । गत आवको सोही अवधिमा कम्पनीले रू. १६ करोड ४५ लाख नाफा कमाएको थियो । पहिलो त्रैमासमा कम्पनीको खुद ब्याज आम्दानी र सञ्चालन नाफामा वृद्धि भएकाले नाफा बढेको हो । कम्पनीको चुक्तापूँजी रू. ४ अर्ब ६८ करोड छ । कम्पनीले ५० प्रतिशत हकप्रद शेयर जारी गरेपछि पूँजी रू. ४ अर्ब पुगेको हो । नेपाल राष्ट्र बैंकले वाणिज्य बैंकको चुक्तापूँजी रू. ८ अर्ब पुर्‍याउन निर्देशन दिएको थियो । राष्ट्र बैंकले तोकेको चुक्तापूँजी अझै पुगेको छैन । पहिलो त्रैमासमा कम्पनीले रिजर्भ कोषमा रू. ४ अर्ब ९० करोड छुट्याएको छ । यो गत आवको सोही अवधिको तुलनामा ३९ प्रतिशत बढी हो ।

कम्पनीको चालू आवको पहिलो त्रैमासिक वित्तीय विवरणअनुसार आर्थिक वर्ष २०७५/७६ र २०७४/७५ बीच तुलना गर्दा :

पहिलो त्रैमासमा कम्पनीले रू. ६२ अर्ब ८४ करोड निक्षेप संकलन गरेको छ भने रू. ५७ अर्ब ३० करोड कर्जा प्रवाह गरेको छ । गत आवको तुलनामा निक्षेप १ प्रतिशत र कर्जा प्रवाह १९ प्रतिशत बढी हो ।
रू. २ अर्ब ३ करोड ब्याज आम्दानी हुँदा रू. १ अर्ब २२ करोड ब्याज खर्च भएको छ । गत आवको पहिलो त्रैमासमा रू. १९ करोड ७७ लाख कर्मचारी खर्च भएकोमा चालू आवको पहिलो त्रैमासमा रू. ३० करोड ६२ लाख खर्च भएको छ । गत आवको सोही अवधिको तुलनामा कर्मचारी खर्च ८० प्रतिशत बढेको छ ।
खुद ब्याज आम्दानी १ सय ३२ प्रतिशत बढेर रू. ८० करोड ८० लाख र सञ्चालन नाफा ८० प्रतिशत बढेर रू. ६१ करोड ३० लाख पुगेको छ । निष्क्रिय कर्जा ३ दशमलव ६९ प्रतिशत, पूँजीकोष लागत ७ दशमलव ८८ प्रतिशत र पूँजीकोष पर्याप्तता १२ दशमलव ६७ प्रतिशत छ ।
पहिलो त्रैमासिक वित्तीय विवरणअनुसार प्रतिशेयर आम्दानी रू. ४० दशमलव ०५, मूल्य आम्दानी अनुपात ५ दशमलव ३९, तरलता अनुपात २२ दशमलव २५ र प्रतिशत नेटवर्थ रू. २ सय ५ दशमलव ०४ छ । मंगलवारको शेयरमूल्य रू. २ सय १४ कायम भएको छ ।
डिभिडेण्ड इल्ड रेसियो : प्रतिशेयर लाभांश (गत वर्ष)/प्रति शेयर बजार मूल्य×१००

अर्निङ पावर रेशियो : कर तिरेपछिको नाफा/कुल सम्पत्ति

अर्निङ इल्ड रेशियो : प्रतिशेयर आम्दानी/प्रतिशेयर बजार मूल्य× १००

खरीद चाप : कम्पनीको मंगलवार भएको शेयर कारोबारको अन्तिम समयसम्ममा विक्री चापको तुलनामा खरीद चाप बढी रहेको छ । सो अवधिसम्म ४७ हजार ४ सय ५६ कित्ता शेयर खरीद गर्ने माग र १८ हजार ८ सय ८६ कित्ता शेयर विक्री गर्ने माग थियो ।

निष्कर्ष कम्पनीको ५९ दिनको कारोबार अवधिको अन्तिम दिनमा क्लोजिङ कालो मारुबोजु आकृति बनेको छ । यस्तो आकृतिले कम्पनीको शेयरमूल्य आगामी दिनमा घट्ने संकेत गर्छ । आरएसआई न्युट्रल जोन ५३ दशमलव २३ विन्दुमा छ । यसले शेयर खरीदविक्री चाप सन्तुलनामा रहेको देखाउँछ । कम्पनीको स्ट्याण्डर्ड डेभिएशन २ दशमलव २२ विन्दुमा छ । उतारचढाव न्यून छ । यस्तो अवस्थामा कम जोखिम हुन्छ भने प्रतिफल पनि कम हुने गर्छ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग नजिकिएका छन् । हालको मूल्य यी दुई रेखाभन्दा माथि छ । पछिल्लो शेयरमूल्य रू. २ सय १४ देखि बजारको अवस्था परिवर्तन भई मूल्य महँगिएमा रू. २ सय २१ मा प्रतिरोध पाउने र मूल्य सस्तिएमा रू. २ सय १० मा टेवा पाउने देखिन्छ ।