नेपाल इन्स्योरेन्स : कम्पनी विश्लेषण (बिहीवार, १२ पुस २०७५)

आर्थिक अभियान

नेपालको पहिलो निर्जीवन बीमा कम्पनी नेपाल इन्स्योरेन्स कम्पनीले चालू आव २०७५/७६ को पहिलो त्रैमासमा रू. ४ करोड ४७ लाख नाफा कमाएको छ । यो नाफा गत आवको सोही अवधिको तुलनामा ६८ दशमलव ९९ प्रतिशत बढी हो । कम्पनीले गत आवको सोही अवधिमा रू. २ करोड ६५ लाख नाफा कमाएको थियो । पहिलो त्रैमासमा कम्पनीको आम्दानीमा ८५ दशमलव ९७ प्रतिशत वृद्धि भएकाले नाफामा वृद्धि भएको हो । कम्पनीको चुक्तापूँजी रू. ६१ करोड ७३ लाख छ । कम्पनीले रू. ४ दशमलव ५२ प्रतिशत बोनस शेयर वितरण र शत प्रतिशत हकप्रद शेयर जारी गरेपछि चुक्तापूँजी रू. ६१ करोड ७३ लाख पुगेको हो । शत प्रतिशत हकप्रद शेयर र बोनस शेयर वितरण गरेपछि कायम हुने चुक्तापूँजीको ६५ प्रतिशत हकप्रद शेयर जारी गर्ने तयारीमा कम्पनी छ । कम्पनीले मङ्सिर ५ गते धितोपत्र बोर्डमा ४० लाख १४ हजार ६ सय ५१ दशमलव ५८ कित्ता हकप्रद शेयर जारी गर्न निवेदन दिएको छ । यो हकप्रद शेयर निष्कासन तथा बाँडफाँट गरेपछि कम्पनीको चुक्तापूँजी रू. १ अर्ब १ करोड पुग्नेछ ।

कम्पनीको आव २०७५/७६ र आव २०७४/७५ को पहिलो त्रैमासिक वित्तीय विवरणबीच तुलना :

• कम्पनीले रिजर्भ कोषमा रू. २६ करोड ५१ लाख छुट्याएको छ । यो रकम गत आवको सोही अवधिको तुलनामा ६५ प्रतिशत बढी हो । कम्पनीले बीमा कोषमा रू. २० करोड ८६ लाख जम्मा गरेको छ । यो गत आवको पहिलो त्रैमासको तुलनामा ३९ प्रतिशत बढी हो ।
• कम्पनीको खुद चालू सम्पत्ति रू. ६३ करोड ६६ लाख छ । पहिलो त्रैमासमा कम्पनीले रू. ८ करोड ४० लाख आम्दानी गर्दा रू. ३ करोड ९३ लाख खर्च भएको छ । पुनर्बीमा कमिशनबाट रू. ४ करोड ९५ लाख आम्दानी भएको छ ।
• कम्पनीले रू. ३२ करोड १३ लाख बीमा शुल्क आर्जन भएको छ । यो रकम गत आवको पहिलो त्रैमासको तुलनामा ५१ प्रतिशत बढी हो । जारी बीमालेखको संख्या ३८ हजार १ सय १० र नवीकरण गरिएको बीमालेखको संख्या १ हजार ४ सय ३६ छ ।
• कम्पनीले ३ सय ६ जनालाई रू. ८ करोड ३० लाख दाबी भुक्तानी गरेको छ भने १ हजार ८ सय ७९ जनालाई रू. १ अर्ब ४ करोड दाबी भुक्तानी गर्न बाँकी छ ।
• पहिलो त्रैमासिक वित्तीय विवरणअनुसार प्रतिशेयर आम्दानी रू. ७ दशमलव २५, मूल्य आम्दानी अनुपात ७४ दशमलव ३४ र प्रतिशेयर नेटवर्थ रू. १ सय ७६ दशमलव ७० छ । बुधवारको शेयरमूल्य रू. ५ सय ८४ कायम भएको छ ।
• डिभिडेण्ड यिल्ड रेशियो : ०.७७%
• अर्निङ पावर रेशियो : ०.०४१ गुणा
• अर्निङ यिल्ड रेशियो : . १.२४%
• खरीद चाप : कम्पनीको बुधवार भएको शेयर कारोबारको अन्तिम समयसम्म विक्री चापको तुलनामा खरीद चाप बढी छ । यस अवधिसम्म ४२ हजार ६ कित्ता शेयर खरीद र ४ हजार २ सय ६३ कित्ता शेयर विक्री गर्ने माग थियो ।

निष्कर्ष कम्पनीको ५८ दिनको कारोबार अवधिको अन्तिम दिनमा ह्याम्मर आकृति बनेको छ । यस्तो आकृतिले कम्पनीको शेयरमूल्य बुलिशमा रिभर्स हुने संकेत देखाउँछ । विश्वसनीयता भने सामान्य छ । कम्पनीको आरएसआई न्युट्रल जोन ६४ दशमलव २६ स्केलमा छ । यसले शेयर खरीदविक्री चाप सन्तुलनामा रहेको देखाउँछ । त्यस्तै, स्ट्याण्डर्ड डेभिएशन १८ दशमलव १९ विन्दुमा छ । यसले उतारचढाव न्यून रहेको देखाउँछ । यस्तो अवस्थामा जोखिम कम हुन्छ भने प्रतिफल पनि कम हुने गर्छ । मुभिङ एभरेजमा २६ दिने औसत मूल्यरेखा र १४ दिने मूल्यरेखा एकअर्कासँग टाढिंदै गएका छन् । हालको शेयरमूल्य यी दुई रेखाभन्दा माथि छ । पछि शेयरमूल्य रू. ५ सय ८४ देखि बजारको अवस्था परिवर्तन भई मूल्य महँगिएमा रू. ६ सयमा प्रतिरोध र मूल्य सस्तिएमा रू. ५ सय ६० मा टेवा पाउने देखिन्छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस