एनएमबी माइक्रोफाइनान्स वित्तीय संस्था : कम्पनी विश्लेषण (बिहीवार, १९ पुस २०७५)

Jan 3, 2019

लगानी कम्पनी विश्लेषण

आर्थिक अभियान राष्ट्र बैंकबाट ‘घ’ वर्गको इजाजत प्राप्त एनएमबी माइक्रोफाइनान्स वित्तीय संस्थाले २०७४/७५ को नाफाबाट शेयरधनीलाई १५ प्रतिशत बोनस शेयर र शून्य दशमलव ७८९४७४ प्रतिशत नगद लाभांश वितरण गर्ने प्रस्ताव गरेको छ । यो लाभांश पारित गर्न कम्पनीले पुस २९ गते साधारणसभाको आयोजना गर्दै छ । पुस १२ गतेसम्म शेयर स्वामित्व कायम शेयरधनीले उक्त लाभांश पाउनेछन् । कम्पनीले १ बराबर १ दशमलव ५ अनुपातमा हकप्रद शेयर जारी गर्ने प्रस्ताव पनि सभामा लैजाँदै छ । चालू आवको पहिलो त्रैमासमा कम्पनीले रू. १० लाख १७ हजार नाफा कमाएको छ । यो नाफा गत आवको सोही अवधिको तुलनामा ८८ प्रतिशत कम हो । पहिलो त्रैमासमा कम्पनीको खर्च बढेकाले नाफा घटेको हो । कम्पनीको चुक्तापूँजी रू. १४ करोड ८ लाख छ । कम्पनीले रिजर्भ कोषमा रू. ११ करोड १३ लाख छुट्याएको छ । कम्पनीले हाल ९५ ओटा शाखा कार्यालय र ५ ओटा उपशाखा गरी कुल १ सयओटा शाखा कार्यालयबाट लघुवित्त सेवा प्रदान गर्दै आएको छ ।

कम्पनीको चालू आवको पहिलो त्रैमासिक वित्तीय विवरणअनुसार आर्थिक वर्ष २०७५/७६ र २०७४/७५ बीच तुलना गर्दा :

कम्पनीले पहिलो त्रैमासमा रू. ७७ करोड ५४ लाख निक्षेप संकलन गरेको छ भने रू. २ अर्ब ३७ करोड कर्जा प्रवाह गरेको छ । गत आवको सोही अवधिको तुलनामा निक्षेप ६८ प्रतिशत र कर्जा प्रवाह २१ प्रतिशत बढी हो । लगानी रू. २० लाख छ ।
रू. १० करोड ८७ लाख ब्याज आम्दानी गर्दा रू. ६ करोड ४६ लाख ब्याज खर्च भएको छ । कर्मचारी खर्च ३७ दशमलव ९३ प्रतिशत बढेर रू. ३ करोड ७० लाख र अन्य सञ्चालन ४० प्रतिशत बढेर रू. १ करोड १९ लाख पुगेको छ ।
कम्पनीले सम्भावित जोखिमबापतको व्यवस्थामा रू. १ करोड २९ लाख छुट्याएको छ । पूँजी कोष लागत ९ दशमलव ७३ प्रतिशत, निष्क्रिय कर्जा २ दशमलव ७२ प्रतिशत र पूँजी कोष पर्याप्तता १० दशमलव ५० प्रतिशत छ ।
कम्पनीको पहिलो त्रैमासिक वित्तीय विवरणअनुसार तरलता अनुपात १९ दशमलव ८८ प्रतिशत, प्रतिशेयर नेटवर्थ रू. १ सय ७९ दशमलव ०६, प्रतिशेयर आम्दानी (वार्षिक) रू. २ दशमलव ८९ र मूल्य आम्दानी अनुपात (वार्षिक) रू. ५ सय ६९ दशमलव २८ छ । बुधवारको शेयरमूल्य रू. १ हजार १ सय १५ कायम भएको छ ।
अर्निङ पावर रेशियो : ०.०००३ गुणा
अर्निङ यिल्ड रेशियो : ०.२५ प्रतिशत
विक्री चाप : कम्पनीको बुधवार भएको शेयर कारोबारको अन्तिम समयसम्ममा खरीद चापको तुलनामा विक्री चाप बढी छ । सो अवधिसम्म ७ सय ७० कित्ता शेयर खरीद गर्ने माग र १ सय कित्ता शेयर विक्री गर्ने माग थियो ।

निष्कर्ष कम्पनीको५५ दिनको कारोबार अवधिको अन्तिम दिनमा ओपनिङ सेतो मारुबोजु आकृति बनेको छ । यस्तो आकृतिले कम्पनीको शेयरमूल्य आगामी दिनमा बढ्ने संकेत गर्छ । आरएसआई न्युट्रल जोन ४६ दशमलव ५७ विन्दुमा छ । यसले शेयर खरीदविक्री चाप सन्तुलनामा रहेको देखाउँछ । कम्पनीको स्ट्याण्डर्ड डेभिएशन ८९ दशमलव ०९ विन्दुमा छ । उतारचढाव सामान्य छ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग टाढिएका छन् । हालको मूल्य यी दुई रेखाको बीचमा छ । पछिल्लो शेयरमूल्य रू. १ हजार १ सय १५ देखि बजारको अवस्था परिवर्तन भई मूल्य महँगिएमा रू. १ हजार ३ सय ३६ मा प्रतिरोध पाउने र मूल्य सस्तिएमा रू. १ हजार ५९ मा टेवा पाउने देखिन्छ ।