जापानी बजारमा पुग्यो काली मार्सी चामल, क्यानडा पनि  पठाउने तयारी       

फागुन २०, खलङ्गा(जुम्ला) । जुम्ली मार्सी चामल र अर्गानिक सिमी लगायत कृषिवस्तुका माग अन्तरराष्ट्रिय बजारमा निर्यात बढ्न थालेको छ ।

जिल्लाबाट पहिलोपटक ६ लाख रुपैयाँभन्दा बढीका ती सामग्री जापान निर्यात भएको छ । अग्र्यानिक्स एण्ड सुपरफुडका सञ्चालक राज शाहीले तीन टन मार्सी र सिमी निर्यात गरेका हुन् ।     
     
व्यावसायिकरूपमा कर्णालीका खाद्यान्न अन्तरराष्ट्रिय बजारमा पुर्‍याउने लक्ष्यका साथ पहिलोपटक ती सामग्री निर्यात भएको उनले जानकारी दिए । उनले भने, “टोकियोमा रहेको पूर्ण ट्रेडिङका सञ्चालक भुवन श्रेष्ठको समन्वयमा एक टन मार्सी चामल, मासको दाल, दुई टन सिमी र १० किलो स्याउको चाना गरी निर्यात गरिएको छ । ”

कर्णालीका कृषि वस्तुको व्यावसायिकरूपमा निर्यात भएको यो पहिलोपटक रहेको यहाँका स्थानीयवासी बताउँछन् । ती सामग्रीले कर्णालीका किसानको जीवनस्तर उकास्नेसँगै जुम्ली मार्सी र सिमीको माध्यमबाट नेपालको नाम अन्तरराष्ट्रिय बजारमा चिनाउन सफल भएको छ ।     
     
क्यानडा निर्यातको अन्तिम तयारी     
     
२० टन जुम्ली मार्सी सिमी क्यानडा पठाउने तयारी अन्तिम चरणमा पुगेको छ । १५ टन मार्सी, चार टन सिमी, हरियो केराउ र कोदो गरेर एक टन क्यानडामा माग भएको सञ्चालक शाहीले बताए ।

क्यानडास्थित लायम फुड कर्पोरेशनका डा पूर्ण कँडेलको समन्वयमा ती वस्तु निर्यात गर्न लागिएको छ । ती सामानमा ‘कर्णाली सुपरफुड’ लोगो हुने सुपरफुडले बताएको छ । अहिले प्याकेजिङ भइरहेको छ । क्यानडा सामान पठाउन भने केही अप्ठ्यारो भएको उनले बताए ।

“जापानको लागि स्ट्याण्डर्ड नचाहिने रहेछ, हामीले यहाँबाट सामान पठाएपछि उनीहरूले नै प्याकिङ गर्छन् र बजार पठाउँछन्”, उनले भने, “क्यानडामा हामीले यहाँबाट नै प्याकिङ गरेर पठाउने भएकाले निकै गाह्रो भइरहेको छ ।”     
     
काठमाडौंको नयाँ बानेश्वरमा रहेको ‘जुम्ला घर अर्गानिकक्स’मा कर्णालीमा उत्पादित स्याउ, सिमी, लसुन, दाल, ओखर, मार्सी चामल, कोदोको पिठो, जिम्बु, हर्बल टी, चिनो, कागुनो र कालिकोटको टिमुर उपलब्ध रहेको सञ्चालक शाहीले बताए। रासस

प्रतिक्रिया [0]