सुर्खेत प्रशासनद्वारा बजार अनुगमन

सुर्खेत (अस) । दैनिक उपभोग्य वस्तुको मूल्य अचाक्ली बढेपछि सुर्खेत प्रशासनले बजार अनुगमन तीव्र पारेको छ । जिल्लामा १६ वैशाखदेखि जारी निषेधाज्ञाको फाइदा उठाउँदै व्यापारीले आफूखुसी मूल्यवृद्धि गरेको गुनासो आएपछि स्थानीय प्रशासनले बजार अनुगमनलाई तीव्रता दिएको हो । सहायक प्रमुख जिल्ला अधिकारी रोमबहादुर महतको अगुवाइमा मेडिकल, खाद्यान्न, तरकारी, सब्जीमण्डीलगायत पसलको अनुगमन गरिएको छ । निषेधाज्ञाका बेला बजारमा कालोबजारी हुने, कृत्रिम अभाव सिर्जना गरी उपभोक्तालाई मर्कामा पारिने हुँदा अनुगमनलाई तीव्रता दिइएको सहायक प्रजिअ महतले बताए ।

वीरेन्द्रनगरका १३ वटा दैनिक उपभोग्य वस्तुका पसल तथा तरकारीमण्डीको अनुगमन गरिएको उनले जानकारी दिए । ‘अनुगमनका क्रममा विशेषगरी तेल, पिठोलगायत वस्तुमा मूल्यवृद्धि भएको पाइयो,’ उनले भने, ‘दैनिक उपभोग्य वस्तुको मूल्यवृद्धिबारे उत्पादक कम्पनीमाथि नै छानबिनका लागि वाणिज्य विभागलाई पत्र पठाइसकेका छौँ ।’

प्रतिक्रिया [0]