राष्ट्रिय बीमा कम्पनी : कम्पनी विश्लेषण (बिहीवार, १३ जेठ २०७८)

राष्ट्रिय बीमा कम्पनीले हालसम्म पनि तोकेबमोजिमको चुक्ता पुँजी कायम गर्न सकेको छैन । हाल कम्पनीको चुक्ता पुँजी रु. २६ करोड ६६ लाख ३९ हजार रहेको छ ।

चालू आर्थिक वर्षको तेस्रो त्रैमाससम्म कम्पनीको जगेडा कोष रकम रु. ३ अर्ब १० करोड ३३ लाख ५३ हजार रहेको छ । कम्पनीले यस अवधिसम्म रु. २७ करोड १२ हजार खुद नाफा गरेको छ ।

रु. १ अर्ब ३७ करोड ६३ लाख ३७ हजार कुल बीमाशुल्क आर्जन गरेको कम्पनीले रु. १४ करोड ७४ लाख २९ हजार कुल दाबी भुक्तानी गरेको छ । २०७१ साल वैशाख २३ गतेको निर्णयबमोजिम राष्ट्रिय बीमा संस्थानसँग अलग भएर निर्जीवन बीमा व्यवसाय सञ्चालन गर्दै आएको कम्पनीको बीमा कोष रकम रु. २ अर्ब ३८ करोड ५० लाख २२ हजार छ ।

वार्षिक प्रतिशेयर आम्दानी रु. १३५ दशमलव शून्य २ रहेको कम्पनीको पछिल्लो कारोबार दिन अन्तिम शेयर मूल्य रु. २१ हजार ४९९ कायम भएको छ ।

निष्कर्ष
कम्पनीको ४९ दिनको कारोबार अवधिको अन्तिम दिनमा टुप्पी र पुच्छर भएको लामो सेतो शरीरको मैनबत्ती बनेको छ । यस्तो मैनबत्तीले बजारमा कम्पनीको शेयर मूल्य बढेको संकेत गर्छ । आरएसआई ओभरबौज्ट जोन ७५ दशमलव शून्य ६ बिन्दुमा छ ।

यसले शेयर खरिद चाप उच्च रहेको देखाउँछ । कम्पनीको स्ट्यान्डर्ड डेभिएसन ७४६ दशमलव ८० बिन्दुमा छ । उतारचढाव उच्च रहेको देखाउँछ । यस्तो अवस्थामा जोखिम बढी हुन्छ भने प्रतिफल पनि बढी प्राप्त हुने गर्दछ ।

त्यस्तै, कम्पनीको मुभिङ एभरेज २६ दिने औसत मूल्यरेखा र १४ दिने औसत मूल्यरेखा एकअर्कामा टाढिएका छन् । हालको मूल्यरेखा यी दुवै मूल्यरेखाभन्दा माथि छ ।

मंगलबारको शेयर मूल्य रु. २१ हजार ४९९ देखि बजारको अवस्था परिवर्तन भई मूल्य सस्तिए रु. २० हजार ३५०मा टेवा पाउने देखिन्छ । कम्पनीको यो मूल्य ४९ कारोबार दिनयताकै उच्च रहेको छ ।

प्रतिक्रिया [0]