अङ्ग्रेजी नयाँ वर्षमा बढ्दै पर्यटकीय चहलपहल, होटलहरूको बुकिङ ८० प्रतिशतसम्म

प्रतिक्षा कडेल

काठमाडौं । अघिल्लो अङ्ग्रेजी नयाँ वर्षमा पोखरा पुग्ने विदेशी पर्यटक फाट्टफुट्ट मात्रै थिए । त्यहाँका होटलमा ग्राहकको चाप थिएन । पोखरा मात्रै होइन, देशभरका अन्य पर्यटकीय क्षेत्रको अवस्था पनि उस्तै थियो । 

तर, यो वर्ष अवस्था फेरिएको छ । नजिकिँदै गरेको अङ्ग्रेजी नयाँ वर्षका लागि पोखरालगायत देशभरका पर्यटकीय क्षेत्रहरूमा पर्यटकको चहलपहल बढ्न थालेको छ । कोरोना महामारीयता सुनसानझैं देखिएका होटल तथा पर्यटकीय गन्तव्य अहिले विदेशी पर्यटकले भरिन थालेका छन् । 

कोरोनाको असर कम भएसँगै नेपाल भित्रिने पर्यटकको संख्या पनि बढेको छ । अघिल्लो वर्षको तुलनामा यो वर्ष नेपाल आउने पर्यटकको संख्या दोब्बरभन्दा बढी छ ।  सन् २०२२ को नोभेम्बरसम्ममा ५ लाख ६५ हजार पर्यटक नेपाल भित्रिसकेका छन् । सन् २०२१ मा भने नेपाल आउने पर्यटकको संख्या साढे २ लाखभन्दा कम थियो । 

कोरोना महामारीयता पर्यटक गतिविधि बढ्न थालेपछि व्यवसायी पनि उत्साहित छन् । पर्यटक बढेसँगै पर्यटन व्यवसाय लयमा फर्किने व्यवसायीको अपेक्षा छ । 

धमाधम बुकिङ हुँदै होटल 

नयाँ वर्ष नजिकिएसँगै देशभरका पर्यटकीय गन्तव्यमा होटल धमाधम बुकिङ भइरहेका छन् । नयाँ वर्षको लागि काठमाडौंको ठमेल, कास्कीको पोखरा, काभ्रेपलाञ्चोकको धुलिखेल, भक्तपुरको नगरकोटलगायत क्षेत्रका होटल धमाधम बुकिङ हुन थालेको त्यहाँका व्यवसायीहरू बताउँछन् । होटल बुकिङ पनि अघिल्लो वर्षको तुलनामा बढेको व्यवसायीहरू बताउँछन् । 

होटल संघ, पोखराका अध्यक्ष लक्ष्मण सुवेदीले नयाँ वर्षको लागि अहिले बुकिङ शुरु भइसकेको बताए । ‘अहिलेसम्म ५० प्रतिशत होटल बुकिङ भइसकेको छ । अझै समय छ बुकिङ गर्ने,’ उनले अभियानसँग भने । उनले अझै होटल बुकिङ हुने अपेक्षा गरे ।  

अहिले भने आन्तरिक पर्यटकले लेकसाइडका होटल भरिभराउ रहेको उनको भनाइ छ । आजबाट सडक महोत्सब शुरू भएकाले होटल भरिभराउ भएको उनले बताए । उक्त महोत्सव पुस १७ गतेसम्म चल्नेछ । पोखरामा १ हजार २०० होटल छन् । 

विदेशी पर्यटकहरू नयाँ वर्षमा बिदा मनाउन नेपाल आउने गरेको व्यवसायीहरू बताउँछन् । ‘विदेशी पर्यटकहरू क्रिसमसदेखि नयाँ वर्षसम्म बस्छन् । आन्तरिक पर्यटक भने क्रिसमसका लागि आएर फर्किसके । अब फेरि नयाँ वर्षको लागि आउँछन्,’ सुवेदीले भने । 

पोखरामा आउने आन्तरिक पर्यटक काठमाडौंका बढी हुने गरेको उनले बताए । 

चितवनको पर्यटक व्यवसायी पनि आउने अंग्रेजी नयाँ वर्षका लागि पर्यटक बढ्ने अनुमान गर्छन् । चितवनस्थित सौराहा जंगल सफारी रिसोर्टका सञ्चालक सुमन घिमिरेले अहिलेसम्म ८० प्रतिशत होटल बुकिङ भइसकेको बताए । ‘अझै बुकिङ भइरहेका छन्,’ उनले भने । 

उनका अनुसार चितवन आउने विदेशी पर्यटकहरूमध्ये अधिकांश सौराहामा ‘न्यू इअर इभ’ मनाएर धेरै पर्यटक न्यू इअरका दिन पोखरा जाने गरेका छन् । विदेशी पर्यटकमा धेरैजसो भारतीय रहेको उनको भनाइ छ । 

भक्तपुरको नगरकोटस्थित होटल मिस्टिक माउन्टेनले पनि नयाँ वर्षको लागि ‘बुकिङ फुल’ भएको जनाएको छ । 

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस