साताको नेप्से: धितोपत्र दोस्रो बजार सकारात्मक गतिमा

अभियान संवाददाता

काठमाडौं । तिहार अघिको साता धितोपत्र दोस्रो बजारका महत्वपूर्ण सूचकहरूमध्ये सेन्सेटिभ इन्डेक्स वाहेक सबै सूचक सकारात्मक बनेका छन् । अघिल्लो साताको तुनलामा गत साता बजार मापक अधिकांश सूचक बढेका हुन ।

नेप्से परिसूचक अघिल्लो साताभन्दा गत साता ४ दशमलव ३८ अंक माथि उक्लिएको छ । अघिल्लो साताको अन्तिम कारोबार दिन १ हजार ८४७ दशमलव ७० विन्दुमा रहेको नेप्से परिसूचक गत साताको अन्तिम कारोबार दिन भने १ हजार ८५२ दशमलव शून्य ८ विन्दुमा झरेको हो । गत साता

पाँच कारोबार दिनमा बजार तीन कारोबार दिन बढेको छ भने दुई कारोबार दिन घटेको छ । साताको पहिलो कारोबार दिन २१ दशमलव ४६ अंकले घटेको नेप्से दोस्रो कारोबार दिन २१ दशमलव ३० अंक, तेस्रो दिन ११ दशमलव २२ अंक र चौथो दिन ५ दशमलव १७ अंक बढेको थियोे । साताको अन्तिम दिन भने नेप्से ११ दशमलव ८५ अंकले घटेर बन्द भएको छ । अन्तिम कारोबार दिन भने लगातार तीन दिन बढेको बजारमा नाफा बुक गर्ने हाबी भएको देखिन्छ ।

लामो समयदेखि घट्दै आएको धितोपत्र दोस्रो बजारमा यतिबेला सूचीकृत कम्पनीहरूको शेयरमूल्य निकै तल झरिसकेको छ । बजार कुन गतिमा अघि बढ्छ भन्नेमा यतिबेला लगानीकर्ता अन्योलमै रहेका छन् । ब्रोकरहरूका अनुसार लगानीकर्ता अन्योलकाबीच पनि यतिबेला सस्तो मूल्यका राम्रा कम्पनीको शेयर भने किनिरहेका छन् । बजार लामो समय घटिसकेकोले अब बढ्ने आशामा पनि लगानीकर्ता रहेको ब्रोकरहरूको अनुमान छ ।

गत साता सकारात्मक देखिएको बजारमा ४ अर्ब ५२ करोड ६६ लाख रूपैयाँभन्दा बढीको १ करोड ७४ लाख ३६ हजार २४६ कित्ता धितोपत्र कारोबार भएको छ । अघिल्लो साता ३ अर्ब ७८ करोड ५१ लाख रूपैयाँभन्दा बढीको १ करोड ४९ लाख ८ हजार ३२७ कित्ता धितोपत्र कारोबार भएको थियो । अघिल्लो साताको तुलनामा गत साता ७४ करोड १४ लाख रूपैयाँभन्दा बढीको २५ लाख २७ हजारभन्दा बढी कित्ता धितोपत्र कारोबार भएको हो ।

औसतमा कारोबार रकम अघिल्लो साताभन्दा गत साता १४ करोड ८२ लाख रूपैयाँभन्दा बढी भएको छ भने कारोबार कित्ता ५ लाख ५ हजार ५८४ कित्ता बढी भएको छ । गत साता लगानीकर्ताको सम्पत्ति मूल्य ६७ करोड ५३ लाख रूपैयाँले बढेको छ । अघिल्लो साताको अन्तिम कारोबार दिन २८ खर्ब ४६ अर्ब २६ करोड रूपैयाँभन्दा बढी रहेको कुल बजार पूँजीकरण गत साताको अन्तिम कारोबार दिन २८ खर्ब ५३ अर्ब १ करोड रूपैयाँभन्दा बढी कायम भएको हो ।

स्रोतः नेपाल स्टक एक्सचेञ्ज (नेप्से)

गत साता होटल तथा पर्यटन समूहका लगानीकर्ताले सर्वाधिक कमाए 
गत साताको कारोबारमा पाँच समूहगत परिसूचक घटेको छ भने आठ समूहगत परिसूचक बढेको छ । गत साता म्युचुअल फण्डको परिसूचक सर्वाधिक शून्य दशमलव ८६ प्रतिशत घटेको छ । त्यस्तै विकास बैकको शून्य दशमलव ८३ प्रतिशत, बैंकिङको शून्य दशमलव ७३ प्रतिशत, लघुवित्तको शून्य दशमलव ७१ प्रतशित र वित्त समूहको शून्य दशमलव शून्य २ प्रतिशत परिसूचक घटेको छ । गत साता होटल तथा पर्यटन समूहको परिसूचक सर्वाधिक ३ दशमलव ४८ प्रतिशत बढेको छ । त्यस्तै उत्पादन तथा प्रशोधनको १ दशमलव ९२ प्रतिशत, अन्यको १ दशमलव ६८ प्रतिशत, व्यापारिकको १ दशमलव ४० प्रतिशत, जीवन बीमाको १ दशमलव १५ प्रतिशत, लगानीको शून्य दशमलव ६२ प्रतिशत, जलविद्युतको शून्य दशमलव ३९ प्रतिशत र निर्जीवन बीमाको शून्य दशमलव ३१ प्रतिशत परिसूचक बढेको छ ।

स्रोतः नेपाल स्टक एक्सचेञ्ज (नेप्से)

प्रतिक्रिया [0]