सम्हालिदैं धितोपत्र दोस्रो बजार : पछिल्लो साता १५ अर्बभन्दा बढीले पूँजीकरणमा बृद्धि

अभियान संवाददाता

काठमाडौं । धितोपत्र दोस्रो बजार पछिल्लो साता सकारात्मक गतिमा अघि बढेको छ । कात्तिक २३ गतेपछि तिहार र छठको सार्वजनिक विदापछि मंङ्सिर ४ गतेदेखि बजार खुला भएको हो । पछिल्लो साता चार कारोबार दिन बजार सञ्चालन भएको छ ।

गत साता अघिल्लो कारोबार साताको तुलनामा नेप्से परिसूचक ८ दशमलव १२ अंक बढेर १ हजार ८६० दशमलव २० विन्दुमा पुगेको छ । त्यस अघिको साता नेप्से परिसूचक १ हजार ८५२ दशमलव शून्य ८ विन्दुमा रहेको थियो ।

गत साता चार कारोबार दिनमा नेप्से परिसूचक तीन कारोबार दिन बढेको छ भने एक कारोबार दिन मात्र घटेको छ । पहिलो कारोबार दिन १ दशमलव ३९ अंकले बढेको बजार दोस्रो कारोबार दिन २३ दशमलव ८२ अंकले घटेको थियो भने तेस्रो कारोबार दिन २० दशमलव ६७ अंक र चौथो कारोबार दिन ९ दशमलव ८७ अंकले बढेको हो ।   

सेन्सेटिभ इन्डेक्स भने शून्य दशमलव शून्य ६ अंकले घटेर ३५६ दशमलव ९८ विन्दुमा झरेको छ । त्यस अघिको साताको अन्तिम कारोबार दिन सेन्सेटिभ इन्डेक्स ३५७ दशमलव शून्य ४ विन्दुमा रहेको थियो ।
पछिल्लो समय बैंक तथा वित्तीय संस्थाहरूले ब्याजदर घटाएको कारण धितोपत्र दोस्रो बजारमा सकारात्मक प्रभाव पर्ने संकेत देखिएको ब्रोकरहरू बताउछन् । बैंकिङ प्रणालीमा तरलता सहज भैरहेको अवस्थामा ब्याजदर कम हुँदा धितोपत्र बजारमा पर्ने सकारात्मक प्रभाव अझ बढी हुनुपर्ने अपेक्षा ब्रोकरहरूको छ ।

गत साता त्यस अघिको साताको तुलनामा कारोबार रकम ४ करोड १३ लाख रूपैयाँभन्दा बढीले घटेको छ । कारोबार कित्ता भने १८ लाख ७ हजार ७८४ कित्ताले घटेको छ । गत साता ४ अर्ब ४८ करोड ५२ लाख रूपैयाँभन्दा बढीको १ करोड ५६ लाख २८ हजारभन्दा बढी कित्ता धितोपत्र कारोबार भएको छ । त्यस अघिको साता ४ अर्ब ५२ करोड ६६ लाख रूपैयाँभन्दा बढीको १ करोड ७४ लाख ३६ हजारभन्दा बढी कित्ता धितोपत्र कारोबार भएको थियो ।

औसतमा भने गत साता कारोबार रकम २१ करोड ५९ लाख रूपैयाँभन्दा बढीले बृद्धि भएको छ । कारोबार कित्ता पनि ४ लाख १९ हजार ८६६ कित्ता बढी भएको छ । गत साता औसतमा १ अर्ब १२ करोड १३ लाख रूपैयाँभन्दा बढीको ३९ लाख ७ हजारभन्दा बढी कित्ता धितोपत्र कारोबार भएको हो । त्यस अघिको साता औसतमा ९० करोड ५३ लाख रूपैयाँभन्दा बढीको ३४ लाख ८७ हजारभन्दा बढी कित्ता धितोपत्र कारोबार भएको थियो ।

गत साताको कारोबारमा धितोपत्र दोस्रो बजारको कुल पूँजीकरण १५ अर्ब १० करोड रूपैयाँभन्दा बढीले बृद्धि भएको छ । अघिल्लो साता २८ खर्ब ५३ अर्ब १ करोड रूपैयाँभन्दा बढी रहेको कुल बजार पूँजीकरण गत साता २८ खर्ब ६८ अर्ब १२ करोड रूपैयाँ कायम भएको हो ।

स्रोतः नेपाल स्टक एक्सचेञ्ज (नेप्से)

गत साता सर्वाधिक कमाउनेमा जीवन बीमा कम्पनी 
गत साता होटल तथा पर्यटन , बैंकिङ, उत्पादन तथा प्रशोधन र लघुवित्त समूह बाहेक अन्य समूहको परिसूचक बढेको छ । गत साता लघुवित्त समूहको परिसूचक सर्वाधिक ३ दशमलव ८६ प्रतिशत घटेको हो । त्यस्तै उत्पादन तथा प्रशोधनको २ दशमलव ३४ प्रतिशत, बैंकिङको शून्य दशमलव ७६ प्रतिशत र होटल तथा पर्यटनको शून्य दशमलव ४६ प्रतिशत परिसूचक घटेको हो । बढेको बजारबाट गत साता जीवन बीमा समूहका लगानीकर्ताले सर्वाधिक कमाएको देखिएको छ ।

जीवन बीमा समूहको परिसूचक सर्वाधिक ४ दशमलव ३३ प्रतिशत बढेको हो । त्यस्तै व्यापारिकको २ दशमलव ५४ प्रतिशत, निर्जीवन बीमाको २ दशमलव ५१ प्रतिशत, जलविद्युतको २ दशमलव ३६ प्रतिशत, विकास बैंकको २ दशमलव ३० प्रतिशत, लगानीको १ दशमलव ८५ प्रतिशत, वित्तको १ दशमलव २४ प्रतिशत, म्युचुअल फण्डको शून्य दशमलव ८७ प्रतिशत र अन्यको शून्य दशमलव शून्य ९ प्रतिशत परिसूचक बढेको हो ।

स्रोतः नेपाल स्टक एक्सचेञ्ज (नेप्से)

प्रतिक्रिया [0]