झन्डै ८७ लाख यात्रुले प्रयोग गरे त्रिभुवन विमानस्थल

अभियान संवाददाता

काठमाडौं। सन् २०२३ मा ८६ लाख ९१ हजार ४६३ हवाई यात्रुले काठमाडौंस्थित त्रिभुवन अन्तरराष्ट्रिय विमानस्थल प्रयोग गरेको तथ्यांक सार्वजनिक भएको छ । यो संख्या हालसम्मकै उच्च हो । अघिल्लो वर्ष सन् २०२२ मा ७९ लाख ५४ हजार ४९५ ले यात्रुले उक्त विमानस्थल प्रयोग गरेका थिए । 

झन्डै ८७ लाख यात्रुले प्रयोग गरे त्रिभुवन विमानस्थल 

त्रिभुवन अन्तरराष्ट्रिय विमानस्थल कार्यालयले शनिवार सार्वजनिक गरेको तथ्यांकअनुसार सन् २०२३ मा ४५ लाख ४१ हजार १३७ अन्तरराष्ट्रिय यात्रुले यो विमानस्थल प्रयोग गरेको र ३१ हजार ४६० पटक अन्तरराष्ट्रिय जहाज उडान–अवतरण भएको देखिन्छ । सन् २०२२ को तुलनामा २०२३ को अन्तरराष्ट्रिय यात्रु संख्या ३० दशमलव १८ प्रतिशतले बढी हो । सन् २०१८ को तुलनामा भने २०२३ को यात्रु वृद्धिदर ४ दशमलव ५ प्रतिशत मात्र छ । तैपनि अन्तरराष्ट्रिय यात्रुको उक्त संख्या हालसम्मकै उच्च रहेको कार्यालयले उल्लेख गरेको छ । 

सन् २०२३ मा आन्तरिकतर्फका ४१ लाख ५० हजार ३२६ यात्रुले यो विमानस्थल प्रयोग गरेका छन् । सन् २०२२ को तुलनामा आन्तरिक यात्रु संख्या ७ दशमलव शून्य ७ प्रतिशतले कम हो । सन् २०२३ मा ९६ हजार ९८९ पटक आन्तरिक जहाज उडान–अवतरण भएको छ । आन्तरिकतर्फका ९ हवाईजहाज र १२ हेलिकोप्टर गरी २१ वायुसेवा कम्पनीले उडान–अवतरणका लागि यो विमानस्थल प्रयोग गरिरहेका छन् । अन्तरराष्ट्रियतर्फ तीन नेपालीसहित ३० वायुसेवा कम्पनीले त्रिभुवन विमानस्थल प्रयोग गर्छन् । तिनले १६ देशका ३१ गन्तव्यमा उडान भर्छन् । 

कोभिडअघि सन् २०१८ मा अन्तरराष्ट्रिय र आन्तरिक गरी ७१ लाख ९० हजार ९१२ र सन् २०१९ मा ७३ लाख २७ हजार ३१ हवाई यात्रुले त्रिभुवन विमानस्थल प्रयोग गरेका थिए । 

नेपालले ४१ मुलुकसँग दुईपक्षीय हवाई सेवा सम्झौता गरेको छ । पछिल्लोपटक गत मङ्सिर १९ गते नेपाल र रुवान्डाबीच द्विपक्षीय हवाई सेवा सम्झौतामा हस्ताक्षर भएको थियो । 

प्रतिक्रिया [0]