काठमाडौं । सर्वसाधारणको रकम सङ्कलन गरेर सूचीकृत धितोपत्र तथा अन्य वित्तीय उपकरणमा लगानी गरिरहेका सामूहिक लगानी कोष (म्युचुअल फण्ड)ले एकाइ धनीहरूलाई आकर्षक प्रतिफल दिइरहेका छन् । दोस्रो बजारमा सूचीकृत कम्पनीहरूले लाभांश घोषणा गर्ने क्रम जारी नै रहँदा सामूहिक लगानी कोषहरूले भने वितरण नै गरिसकेका छन् । नेप्सेमा सूचीकृत ११ सामूहिक लगानी कोषमध्ये ६ ओटाले आर्जित नाफाबाट लाभांश वितरण गरिरहेका छन् । पछिल्लो पटक लाभांश घोषणा गरेको एनएमबी म्युचुअल फण्डअन्तर्गतको ‘एनएमबी सुलभ फण्ड–१’ ले यही असोज ३१ गतेदेखि वितरण गर्ने बताएको छ । बाँकीले डिम्याट खातामा उल्लेख एकाइ धनीको बैङ्कमा लाभांशबापतको रकम पठाइसकेको बताएका छन् । बैङ्क खाता उपलब्ध नभएका एकाइ धनीले पनि लाभांश पुर्जा लिइरहेका छन् । अहिलेसम्म प्रतिफल घोषणा गरेका म्युचुअल फण्डमध्ये सिद्धार्थ लगानी वृद्धि योजनाले सवैभन्दा बढी ६० प्रतिशत नगद लाभांश दिएको छ  । भदौ मसान्तसम्म यस योजनाको कुल रू. ९५ करोड ३१ लाख ८५ हजार विभिन्न धितोपत्रमा लगानी रहेको छ । सो अवधिमा यस योजनाको प्रतिएकाइ खुद सम्पत्ति मूल्य रू. २१ रहेको छ । चालू आवको भदौ मसान्तसम्म सो योजनाले रू. २४ लाख ४४ हजार नाफा कमाएको छ । अहिले सञ्चालित सबै योजनाका एकाइको अङ्कित मूल्य रू. १० रहेको छ । घोषित लाभांशमध्ये एनआईबीएल समृद्धि फण्ड–१ को लाभांश सबैभन्दा कम १८ प्रतिशत रहेको छ । भदौ मसान्तमा प्रतिएकाइ खुद सम्पत्ति मूल्य रू. १२ दशमलव ८९ रहेको यस योजनाले रू. १ अर्ब १४ करोड ८३ लाख ५२ हजार लगानी गरेको छ । चालू आवको भदौ मसान्तसम्म उक्त योजनाले रू. २ करोड ५० लाख ३९ हजार नोक्सान बेहोरेको देखिएको छ । सामूहिक लगानी कोष साना लगानीकर्ताहरूका लागि सबैभन्दा उपयुक्त लगानीका रूपमा लिन सकिन्छ । यस्ता कोषले सर्वसाधारणबाट सङ्कलन गरेको रकम विभिन्न वर्गका धितोपत्रहरूमा विभाजन गरेर लगानी गर्ने हुनाले जोखीमको तुलनामा प्रतिफल उच्च रहने गर्छ । यद्यपि, यस्ता कोषमा गरिएको लगानी पूर्णरूपमा जोखीममुक्त भने हुँदैन । साथै सामूहिक लगानी कोषमा गरिएको लगानीबाट प्राप्त लाभांशमा करसमेत छूट हुने भएकाले सर्वसाधारणमा यसको आकर्षण हुने गर्छ ।