पुल नहुँदा साँघुबाट नै खोला तर्न बाध्य पर्वतका वासिन्दा

रोशन तिवारी

फागुन ४ पर्वत । वषौं देखि साँघुरो र जोखिमयुक्त साँघुबाटै स्थानीय आउजाउ गर्छन । स्कुले बालबालिका पनि याँहिबाट हातखुट्टा टेकेर विद्यालय पुग्ने गरेका छन् । घाँसपात ओसार्न पनि उस्तै असहज अवस्था रहेको छ । हिउँदमा खोलो सुक्दा खोलामै पसेर तर्न सकिन्छ तर बर्खामा खोलो उर्लिदा भने निकै समस्या हुन्छ । यो कुनै दूर्गम गाउँको समस्या हैन । जिल्लाको कुश्मानगरपालिका र फलेवास नगरपालिका भित्रको सुगम ठाउँ सिमखेतको समस्या हो यो । कुश्मा नगरपालिका १० को पिपलटारी र फलेवास नगरपालिका ३ शङ्करपोखरीको सिमाना सिमखेत स्थित मल्याङ्दीखोलामा पुल नहुँदा वषौँदेखि स्थानीय समस्या झेल्न वाध्य छन् ।

खोलाको वारीपारी रहेका वस्तीका करीब दुई सय घर परिवारले पुल नहुँदा काठको मुढोवाट जोखिम मोलेर खोलो तर्दै आएका छन् । पुलको वारीका वासिन्दाको खेतीपाती पारि छ भने पारीका वासिन्दाको वारी छ । पुल नहुँदा खेतीपाती र मेलापात गर्नेहरुलाई निकै समस्या हुने गरेको स्थानीय हेमप्रसाद अधिकारीले वताए ।

‘स्कुल जाँदै गरेकी हाम्रै गाउँकी वलवहादुर विककी छोरी ३/४ वर्षअगाडी खसेर वितिन,’अधिकारीले भने,‘ वच्चाहरुलाई एक्लै पठाउँदा पुलवाट खस्ने हुन कि भन्ने त्रास हुन्छ ।’ उनले भने–‘न समाउने डाली न टेक्ने हाँगो भने जस्तै यो साँघुबाट ज्यान हत्केलामा राखेर हिँडिरहेका छौँ ।’

७० वर्षिय गुमादेवी अधिकारीले आफू जान्ने भएदेखि यसरी नै जोखिम मोलेर खोलो तर्ने गरेको बताईन । ‘पारीको खेत छ वारीवाट मेलापात जान समस्या हुने गर्छ,’ उनले भनिन् । उनले आफ्ना हलगोरु खोलाले वगाएको पनि सम्झिईन । यहाँ राखिएको मुढा वर्षेनी खोलामा आउने वाढिले वगाउने गरेको छ । ‘वर्खामा वर्षेनी मुढा खोलाले वगाउँदा समस्या हुने गर्छ,’ प्रेमवहादुर कार्कीले भने,‘ फेरि यत्रो काठ जहाँसुकै वनमा पाईँदैन ।’

यहाँ पुल नहुँदा गाउँले त्रहीत्रही भैरहँदा झण्डै एक सय मिटर तल मल्याङ्दीखोलामा रहेको झोलुङ्गेपुल वेकामे वनेको छ । उक्त पुल उप्काएर समस्या रहेको सिमखेतमा सार्न स्थानीयले माग गरेका छन् । झोलुङ्गेपुल नजिकै पक्कि पुल वनेको छ । एकै ठाउँमा झोलुङ्गेपुल र पक्कि पुल छन् । ‘एउटै खोलाको एकैठाउँमा झोलुङ्गेपुल र पक्कि पुल वनाईएपनि नजिकै रहेको गाउँमा मुढाबाट जोखिम मोलेर खोलो तर्न वाध्य हुनु बिडम्वना हो,’ स्थानीय यूवा शिव अधिकारीले भने,‘ हाम्रा गाउँमा नेता धेरै भए तर यो गाउँ हेर्ने कोहि भएनन् ।’

पक्कि पुल वनाउने वेला भएको सार्वजनिक सुनुवाईमा पनि जिल्लाका सरकारी कार्यालयका प्रमुखहरुले पक्कि पुल वनेपछि झोलुङ्गेपुल सिमखेतमा सार्ने आश्वसन दिएका थिए । तर माग सम्बोधन अहिलेसम्म भएको छैन । माग सम्बोधन नभएपछि पटक पटक झोलुङ्गेपुल स्थानान्तरण गरिदिन जिविसमा गाउँले माग लिएर आउने गरेका छन् । तर सम्बोधन भने भएको छैन ।

प्रतिक्रिया [0]