भारतीय पक्षले बाँध निर्माण गरेपछि स्थानीय चिन्तित, रौतहट फेरि डुबानको खतरामा

दिपेश पौडेल

वैशाख ९, रौतहट । रौतहटको दशगाजा क्षेत्रमा भारतीय पक्षले फेरि बाँध निर्माण गरेपछि सिमा क्षेत्रका बासिन्दा चिन्तित भएका छन् । भारतीय बाँधकै कारण गत साउन मसान्तमा डुबानमा परेको उक्त क्षेत्रका स्थानीय फेरि डुबानमा परिने चिन्तामा परेका हुन् ।

ईशनाथ नगरपालिकाको वडा नं. १ बञ्जहरा गाउँमा अहिले भारतीय पक्षले धमाधम बाँध निर्माण गरिरहेको छ । दशगजा क्षेत्रमै भारतीय पक्षले एकपक्षीय रुपमा बाँध निर्माण गरेपछि इशनाथ नगरपालिका र गौर नगरपालिकाका बासिन्दा प्रभावित हुने भएका छन् । पानी निकास हुन नपाउँदा गाउँ पुरै डुबानमा पर्ने गरेको स्थानीय भगवान पासवानको भनाई छ । लालबकैया नदीको पानी गाउँमा पस्ने गरेको र पानीको उचित निकास नभएर हरेक वर्ष स्थानीयले डुबानको समस्या झेल्दै आएको अर्का बन्जहरावासी समसुल खानले बताए । विगतका वर्षहरुमा डुबानको समस्या झेल्दै आएका स्थानीयहरु अहिले भारतीय पक्षले पानीको निकास नदिई दशगजा क्षेत्रमा लगाइरहेको स्थायी बाँधका कारण चिन्तित बनेको खानको भनाइ छ ।

अहिले भारतले धमाधम बोरामा माटो हालेर प्लाष्टिकको जालीको सहायताले स्थायी रुपमा निर्माण गरिरहेको छ । गत साउनको बाढीले सिमा क्षेत्रको लक्ष्मीपुर बेलबिछुअवामा बाँध भत्काएको थियो । अहिले सो भत्काएको बाँधमा पनि भारतले दिगो रुपमा बाँध निर्माण गरिरहेको छ ।

यता, गौर नगरपालिकाका नगर प्रमुख अजय गुप्ताले बाढीले खोलामा भत्काएको बाँध चाँडोभन्दा चाँडो बनाउन आग्रह गरेका छन् । गत साउनमा आएको बाढीले बकैया नदीको देवाही, राजपुरलगायतका स्थानमा बाँध भत्काएको हुँदा सो बाँध चाडोभन्दा चाडो निमार्ण गर्न उनले आग्रह गरेका हुन् ।

प्रतिक्रिया [0]