श्रीराम सुगर मिलले दिन थाल्यो उखुको भुक्तानी, दैनिक ५० लाख किसानको खातामा

दिपेश पौडेल

वैशाख ९, रौतहट । रौतहटको गरुडा स्थित श्रीराम सुगर मिलले उखु किसानको भुक्तानी दिन शुरु गरेको छ । चैत २७ गतेबाट किसानको बैङ्क खातामा उखुको भुक्तानी दिन शुरु गरेको मिलका उखु प्रबन्धक सियाराम साहले बताए ।

नयाँ तथा पुराना वक्यौता गरी मिलले किसानलाई ५६ करोड रुपैयाँ तिर्न बाँकी रहेको जानकारी दिँदै अहिले दैनिक ५० लाख रुपैयाँका दरले किसानलाई उखुको भुक्तानी दिएको उनले बताए । हाल उद्योगले प्रतिक्विण्टल ५ सय ३१ रुपैयाँ २० पैसाका दरले भुक्तानी दिएको छ । करीब ५ करोडभन्दा बढी रकम भुक्तानी भैसकेको प्रबन्धक साहले बताए । मिलले यस सिजनमा खरीद गरेको भुक्तानी दिईरहेको र असार मसान्तसम्म भुक्तानी दिईसक्ने उनको भनाई छ । त्यसपछि पुरानो बक्यौता १६ करोड रुपैयाँ रकम भुक्तानी दिने उनले जानकारी दिए ।

मिलले ५१ करोड रुपैयाँ बराबरको उखु खरीद गरेको र यसअघि नै ११ करोड रुपैयाँ भुक्तानी दिईसकेको मिलले जानकारी दिएको छ । श्रीराम सुगर मिलले चैत ३ गतेसम्म ९ लाख ७९ हजार ६ सय ११ क्विन्टल उखु क्रसिङ्ग गरेर बन्द भएको छ । यसअघि किसान सङ्घका पदाधिकारीहरुसँग भएको सहमतिअनुसार उखुको भुक्तानी भएको हो ।

यसअघि तत्काल उखुको भुक्तानी दिन माग गर्दै उखु उत्पादक सङ्घ रौतहटले श्रीराम सुगर मिलका सञ्चालकसँग आग्रह गरेको थियो । रौतहट उखु खेतिका लागि पकेट क्षेत्र मानिन्छ । रौतहटमा यो सिजनमा ७ हजार बिगाहमा उखु खेति भएको छ । मिल बन्द भएपछि किसानले सख्खर उधोग (खाँडसरी)मा उखु दिने गरेका छन् ।

प्रतिक्रिया [0]