सर्वोच्चको आदेश बमोजिम प्रकाण्डलाई प्रहरीले अदालत उपस्थित गरायो, छाड्ने वा नछाड्ने विषयमा आजै बहस हुने

विकास भट्टराई

साउन ३१, काठमाडौं । नेपाल कम्युनिष्ट पार्टी (विप्लब)को स्थायी समिति सदस्य तथा प्रवक्ता खड्गबहादुर विश्वकर्मा (प्रकाण्ड)लाई प्रहरीले बिहीवार सर्वोच्च अदालतमा उपस्थित गराएको छ । पक्राउ परेका विश्वकर्मालाई गैरकानूनी रुपमा थुनामा राखिएको उल्लेख गर्दै उनका छोरा नरेन्द्र बहादुर विश्वकर्माले आइतवार सर्वोच्चमा बन्दी प्रत्यक्षीकरणको रिट निवेदन दायर गरेका थिए । कायममुकायम प्रधानन्यायाधीश ओम प्रकाश मिश्रले तीन दिन अगाडि उनलाई सर्वोच्चमा उपस्थित गराउन आदेश दिएका थिए । विश्वकर्मालाई अदालतमा उपस्थित गराएपछि सर्वोच्चले सुनुवाईका लागि पेशी तोक्ने तयारी गरेको छ । प्रहरीले अहिले उनलाई अदालतमा ल्याएको लिखित जवाफ फाँटमा दर्ता गराउने कार्य गरिरहेको छ । सर्वोच्च प्रशासनबाट थाहा भए अनुसार चिया समयपछि प्रकाण्डलाई छाड्ने वा नछाड्ने विषयमा इजलाशमा बहस हुने छ । कानून विपरित विभिन्न व्यक्ति तथा संस्थासँग ७ करोडभन्दा बढी चन्दा असुल गरेको आरोपमा उनलाई प्रहरीले पक्राउ गरेको थियो । प्रकाण्डको रिहाईको माग गर्दै नेकपाले बुधवार नेपाल बन्दको आव्हान समेत गरेको थियो ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस