अमेरिकी सेनाले तयार पारेको महिला सुरक्षा बास भवन प्रदेश सरकारलाई हस्तान्तरण

रोशनी भट्टराई

फागुन ९, विराटनगर । संघीय सरकारको समन्वय र अमेरिकी जलसेना कमाण्डको सहयोगमा विराटनगर–४, खार्जीमा निर्माण गरिएको सुरक्षा बास भवन बुधवार प्रदेश सरकारलाई हस्तान्तरण गरिएको छ । ७ करोड रूपैयाँको लागतमा बनेको उक्त अत्याधुनिक भवन महिला, बालबालिका तथा ज्येष्ठ नागरिक मन्त्री थममाया थापाले प्रदेश सरकारलाई हस्तान्तरण गरेकी हुन् ।

उक्त भवन अमेरिकी सरकारका तर्फबाट अमेरिकी जलसेनाका सर्जेन्ट केली मेभलर र कमाण्डर वाल्टर सिब्लीले मन्त्री थापालाई सोही कार्यक्रमका अवसरमा हस्तान्तरण गरेका थिए । लगत्तै प्रदेश १ का सामाजिक विकासमन्त्री जीवन घिमिरेलाई सुरक्षा बास भवन हस्तान्तरण गरिएको हो । महिला, बालबालिका तथा ज्येष्ठ नागरिक मन्त्री थापाले हिंसाबाट प्रभावित भएका महिला, बेचबिखनमा परेका बालबालिका लगायतको अल्पकालीन संरक्षणका लागि सुरक्षा बास प्रयोग गर्न आग्रह गरिन् । सुरक्षा बासलाई नमूनाका रूपमा सञ्चालन गर्न समेत प्रदेश सरकारलाई उनले आग्रह गरिन् ।

सामाजिक विकासमन्त्री जीवन घिमिरेले हिंसा प्रभावित महिलाहरूको संरक्षणमा प्रदेश सरकारले थालेको अभियानलाई सुरक्षा बासको हस्तान्तरणले मद्दत पुगेको बताए । उनले संघीय सरकारका धेरै मन्त्रालयले आफ्ना संरचना प्रदेशलाई हस्तान्तरणमा आनाकानी गरिरहेको बेला सुरक्षा आवास बनाई दिने अमेरिकी सरकारबाट संघीय सरकारलाई हस्तान्तरण भएकै दिन प्रदेश सरकारलाई हस्तान्तरण भएकोमा आभार व्यक्त गरे ।

सुरक्षा बासमा भान्सा, शयन कक्ष, शौचालयसहित अत्याधुनिक १५ ओटा कोठा छन् । जहाँ ३० जनासम्मलाई राख्न सकिने बताइएको छ । भवनभित्र आवश्यक पर्ने सबै सामग्री अमेरिकी सेनाले नै व्यवस्थापन गरिदिएको छ । सात कठ्ठा क्षेत्रफलमा बनेको सुरक्षा बास भवन प्रदेश सरकारले कार्यविधि बनाएर सञ्चालन गर्ने बताइएको छ । सुरक्षा बास हस्तान्तरण कार्यक्रममा महिला, बालबालिका तथा ज्येष्ठ नागरिक मन्त्रालयका सहसचिव राजेन्द्रकुमार पौडेल, सामाजिक विकास मन्त्रालयका सचिव हरिप्रसाद दाहाल लगायतको सहभागिता थियो ।

प्रतिक्रिया [0]