७३ प्रतिशत नेपाली बीमाको दायरा बाहिर

मिलन विश्वकर्मा

१७% जनसंख्यामा बीमा पहुँच, असारसम्म २०% पुर्‍याउने लक्ष्य काठमाडौं । बीमा समितिको पुस मसान्तसम्मको तथ्यांकअनुसार नेपालको ७३ प्रतिशत जनसंख्या जीवन बीमाको दायराभन्दा बाहिर छ । हालसम्म ४९ लाख ८७ हजार नेपालीले जीवन बीमा गरेका छन्, जुन नेपालको कुल जनसंख्या करीब ३ करोडको झण्डै १७ प्रतिशत हो । जीवन बीमा कम्पनीहरूले जारी गरेको कुल बीमालेखको संख्यामा पाँच प्रतिशत घटाएर समितिले बीमामा पहुँचको मूल्यांकन गरेको हो । दोहोरिने सम्भावना भएकाले कुल जारी बीमालेखमा उक्त आँकडा घटाएर मूल्यांकन गर्ने अन्तरराष्ट्रिय अभ्यास छ । कम्पनीहरूले पुस मसान्तसम्ममा कुल ५२ लाख ५० हजार बीमालेख जारी गरेका थिए । यद्यपि, यसमा वैदेशिक रोजगार म्यादी जीवन बीमालाई भने समावेश गरिएको छैन । त्योसहित बीमाको पहुँच २३ प्रतिशत जनसंख्यामा पुगेको समितिको भनाइ छ । पुस मसान्तसम्म वैदेशिक रोजगार म्यादी बीमामा कुल १६ लाख ५२ बीमालेख जारी भएको छ । नेपालमा बीमा व्यवसाय शुरू भएको ७२ वर्ष भएको छ । यति लामो अवधिमा पनि कम्पनीहरूले बीमाको पहुँच फराकिलो बनाउन सकेका छैनन् । चालू आर्थिक वर्ष (आव) २०७५/७६ को ६ महीनामा बीमा पहुँच १४ प्रतिशतबाट बढेर १७ प्रतिशतमा पुग्नुलाई समितिले उपलब्धिका रूपमा व्याख्या गर्दै आएको छ । कम्पनीहरूको शाखा विस्तारसँगै आम मानिस बीमाप्रति चेतनशील भएकाले पहुँच बढेको समितिका अध्यक्ष चिरञ्जीवी चापागाईंले बताए । उनले भने, ‘अहिले सबै जिल्लामा कम्पनीको शाखा र स्थानीय तहमा बीमा अभिकर्ता पुगेका छन्, जसले बीमाको पहुँच बढाउन महŒवपूर्ण भूमिका निर्वाह गरेको छ ।’ आगामी असारभित्र बीमाको पहुँच २० प्रतिशत पुर्‍याउने लक्ष्य रहेको उनको भनाइ छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस