७७ जिल्लाका उत्पादनको प्रदर्शनी हुने, २०० ओटा विक्री कक्ष

नरहरि आचार्य

जेठ २०, काठमाडौं । ३०औं राष्ट्रिय लघु घरेलु तथा साना औद्योगिक प्रदर्शनीमा मुलुकका ७७ जिल्लाकै उत्पादन प्रदर्शनीमा राखिने भएको छ । यही जेठ २२ देखि २६ गतेसम्म भृकुटीमण्डपमा हुने औद्योगिक प्रदर्शनीमा ताप्लेजुङदेखि कञ्चनपुरसम्मका लघु घरेलु उत्पादन प्रदर्शनी एवं विक्रीमा रहने घरेलु विभागका महानिर्देशक विनोदप्रकाश सिंहले जानकारी दिए ।

नेपाल घरेलु तथा साना उद्योग महासंघ र घरेलु विभागद्वारा यहाँ सोमवार आयोजित पत्रकार सम्मेलनमा उनले भने, ‘जिल्लागतरुपमा विशिष्ट पहिचान दिने ७७ जिल्लाका उत्पादन यसपटक प्रदर्शनीमा राखिनेछ ।’ मुलुकभर छरिएर रहेका लघु घरेलु तथा साना उद्योगका उत्पादनलाई राष्ट्रिय बजारमा मूलप्रवाहीकरण गर्ने र उद्यमीलाई प्रदर्शनीका क्रममा सम्मान तथा पुरस्कृत गरी हौसल्ला प्रदान गर्दै आएको महासंघका अध्यक्ष श्यामप्रसाद गिरीले बताए । उनले भने, ‘स्वदेशमा उत्पादित वस्तुलाई प्रदर्शनीका माध्यमबाट क्रेता विक्रेताबीच सम्पर्क बढाइ बजार प्रबर्द्धनमा सहयोग गर्ने, राष्ट्रिय मागअनुसार वस्तु उत्पादनमा उद्यमीलाई प्रोत्साहन गर्ने तथा उद्यमीको सीप, प्रविधि र उद्यमशीलताको कदर गर्ने प्रदर्शनीको मूल उद्देश्य हो ।’ ‘आर्थिक समृद्धिका लागि उद्योग खोलौं, औद्योगिकीकरणका लागि सबै जुटौं’ भन्ने मूल नाराका साथ आयोजना हुन लागेको उक्त प्रदर्शनीमा २०० ओटा लघु घरेलु तथा साना उद्योगबाट उत्पादित वस्तुका प्रदर्शनी तथा विक्री कक्ष रहने जानकारी दिइयो । प्रदर्शनीका क्रममा १४ उत्पादन समूह वर्गीकृत गरी लघु उद्यमीलाई पुरस्कृत गरिने कार्यक्रम रहेको पनि जानकारी दिइयो । प्रदर्शनीमा महदेखि बाँस अल्लोबाट उत्पादन हुने कपडासम्म रहनेछ । हालसम्म मुलुकभर ४ लाख १८ हजार ५२ घरेलु र साना उद्योग दर्ता रहेको तथ्यांक रहे पनि आव २०७४/७५ को तथ्यांकअनुसार नेपालमा र्२ लाख ९९ हजार ३११ घरेलु तथा साना उद्योगको संख्या रहेको छ । त्यसमध्ये १ लाख ५० हजार लघुउद्यम सञ्चालनमा छन् भने करीव ९० हजार साना उद्योग रहेको सो अवसरमा जानकारी दिइयो । घरेलु तथा साना उद्योग व्यवसायमा रू.४ खर्ब ११ अर्ब ९५ करोड लगानी रहेको र २६ लाख ६ हजार ८६ जनाले रोजगारी प्राप्त गरिरहेको बताइएको छ । मुलुकको कूल गार्हथ्य उत्पादनमा समग्र औद्योगिक क्षेत्रको छ प्रतिशत योगदान हुँदै आएको छ । मुलुकबाट हुने कूल निर्यातको ७० प्रतिशत भन्दाबढी योगदान घरेलु तथा साना उद्योगबाट हुँदै आएको छ । यसअघि यो प्रदर्शनी वैशाख २६ देखि ३० गतेसम्म गर्ने घोषणा भएकामा स्थान अभावको कारण रोकिएको थियो । रासस

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस