राजस्व चुहावटका ८१ ओटा कसुरमा संलग्न २३८ विरुद्ध मुद्दा, ६६ किलो सुन बरामद

टीपी भुसाल

असार २, काठमाडौं । चालू आर्थिक वर्षको ११ महीनामा राजस्व चुहावटका ८१ ओटा कसुरमा अनुसन्धान सम्पन्न गरी २३८ जना व्यक्तिमाथि मुद्दा दायर भएको छ । ती मुद्दामा बिगो र जरिवाना गरी रू. १८ अर्ब ३२ करोड र ३ वर्षको कैद माग दाबी गरिएको राजस्व अनुसन्धान विभाग, ललितपुरले जानकारी दिएको छ ।

विभागले सुन भन्सार चोरी पैठारीको कसुरमा विभिन्न व्यक्तिहरूबाट ६६ किलो ४०० ग्राम सुन समेत बरामद गरेको छ । यस्तै विदेशी विनिमय अपचलन तथा अवैध हुण्डी कारोबारमा ६४ ओटा मुद्दामा संलग्न १०४ जनालाई विदेशी विनिमय अपचलन तथा हुण्डीको कसुरमा रू. ५ अर्ब ११ करोड बिगो कायम गरी बिगोको तेब्बरसम्म जरिवाना र ३ वर्षसम्म कैद मागदाबीसहित मुद्दा दायर गरिएका विभागका महानिर्देशक दीर्घराज मैनालीले जानकारी दिए ।

यसबाट राजस्व छलि तथा आर्थिक अपराधका जोखिमयुक्त क्षेत्रमा अनुसन्धानलाई केन्द्रित गरिएबाट राजस्व प्रशासनमा सदाचार प्रवर्द्धन भई राजस्व संकलनमा सकारात्मक सुधार हुँदै आएको विभागको दाबी छ । सरकारले आर्थिक वर्ष २०७६/७७ को बजेट वक्तव्यमा पनि चोरी निकासी/पैठारी तथा आन्तरिक उत्पादनको परिवहन समेतलाई ट्रयाकिङ प्रणलीमा आवद्ध गरिने उल्लेख गरेको थियो ।

प्रतिक्रिया [0]