पूर्वाधार र नीतिगत सुधार पर्यटनमन्त्रीको प्राथमिकता 

नेपालको पर्यटन विकासका लागि निगमको छवि सुधारिने  

टीपी भुसाल

 काठमाडौं । नवनियुक्त संस्कृति, पर्यटन तथा नागरिक उड्डयनमन्त्री योगेश भट्टराईले नेपालको पर्यटन विकासका लागि पूर्वाधार विकास, नीतिगत र व्यवस्थापकीय सुधार मन्त्रालयको प्राथमिकतामा रहेको बताएका छन् । उनले पर्यटनको विकासले देशको समग्र आर्थिक विकासलाई प्रभाव पार्ने र राज्यको प्राथमिकताको विषय भएकोले मन्त्रालयले सोहीअनुसार अबका कदम केन्द्रित गर्ने बताए ।  

मन्त्री भएको एक साताभित्र मन्त्रालय मातहतका विभिन्न निकायहरूसँग आवश्यक जानकारी लिने काम भएको जानकारी दिँदै मन्त्री भट्टराईले अब एक्सनमा जानेगरी काम गरिने बताए । मन्त्रालयमा सञ्चारर्मीसँग संक्षिप्त कुराकानी गर्दै उनले अब एक्सनमा जानको लागि पूर्वतयारी भइरहेको र छिटै एक्सनमा जाने बताए । 

‘मन्त्रालयगत कामहरू सम्पन्न गर्न स्पष्ट क्यालेन्डर बनाएर कुन काम कहिले कति समयमा सम्पन्न गर्ने भनेर शुरू गरिनेछ । यसको लागि आवश्यक तयारी भइरहेको छ,’ उनले भने । मन्त्रीले पूर्वाधार विकासका लागि पाइपलाइनमा भएका कामहरूलाई समयमै सम्पन्न गर्ने र नयाँ गर्नुपर्ने कामको लागि छिटै योजना बनाएर काम गरिने जानकारी दिए । 

मन्त्री भट्टराईले नेपाल वायु सेवा निगमको छविलाई नसुधारी नेपालको पर्यटन विकास नहुने समेत बताउँदै निगमको छविलाई माथि उठाउने गरी काम गरिने बताए । ‘निगमका विमान ३८ हजार फिट माथि उड्छन् । निगमलाई पनि त्यही उचाइ नदिँदासम्म निगमको विकास हुँदैन,’ उनले भने ।

उनले नेपाल भ्रमण वर्ष २०२० मा २० लाख पर्यटक ल्याउन बाँकी समयमा आवश्यक सबै काम गरिने उनले बताए । ‘कतिपय साना कामहरू होलान्, कतिपय ठूला कामहरु गर्नुपर्ने छ । ती सबै काम जतिसक्दो छिटो सम्पन्न गरी पर्यटन वर्षको लक्ष्य पूरा गर्ने गरी मन्त्रालयले काम गर्नेछ,’ उनले भने । मन्त्री भट्टराईले सोमवार निगमका उच्च अधिकारीलाई भेटेर कार्ययोजनासहित लगानीको प्रतिफल आउने गरी काम गर्न निर्देशनसमेत दिएका थिए । 
 

प्रतिक्रिया [0]