साउन २४, महेन्द्रनगर । कञ्चनपुरको भीमदत्त नगरपालिकाले गत आर्थिक वर्षमा सडक कालोपत्रे गर्ने लक्ष्य पुरा गर्न असफल भएको छ । नगरपालिकाले गत आव २०७५÷७६ मा १० किलामीटर सडक कालोपत्रेको लक्ष्य लिएको थियो । तर ८ किलोमीटर सडक मात्रै कालोपत्रे सम्पन्न भएको नगरपालिकाका इन्जिनियर हिमालय सिंह ऐरले जानकारी दिए ।
उक्त ८ किलोमीटर कालोपत्रे सडकले नगरपालिकाका १९ ओटै वडालाई भने छोएको छ । इन्जिनियर ऐरका अनुसार नगरपालिकाले गत आवमा ३४ किलोमीटर सडकमा ग्राभेल गरेको छ भने ११ किलोमीटर नयाँ सडकको ट्र्याक खोलिएको छ । नगरपालिकाले गत आवमा सडक तथा पुल निर्माणमा रू. १० करोड १२ लाख ६० हजार बजेट खर्च गरेको छ ।
योजनाको ढिलो ठेक्का सम्झौता र निर्माणमा ठेकेदार पक्षले गरेको ढिलासुस्तीका कारण कालोपत्रेको लक्ष्य पुरा नभएको नगरपालिकाले बताएको छ । ‘नगरपालिकाका केही योजनामा सम्झौता नै ढिलो भयो, केहीमा निर्माण व्यवसायीको कमजोरी पनि रहेको छ,’ इन्जिनियर ऐरले भने ।
गत आवमा नगरपालिकाबाट सञ्चालन गरिएका २१ ओटा योजनाको निर्माण कार्य पूरा भएको छैन । जसमा अधिकांश सडकका योजना छन् । नगरपालिकाले लामो समयपछि गत आवमा कालोपत्रे गर्न लागेको एयरपोर्ट रोडसमेत कालोपत्रे हुन समेको छैन ।
नगरपालिकाले बनाउन लागेको सामुदायिक भवन, नगरपालिका गेट, साईकल पार्किङ लगायतका योजना अधुरै रहेका हुन् ।