साउन २८, म्याग्दी । पाँच मेगावाट क्षमताको घलेम्दी जलविद्युत आयोजनाको आन्तरिक परीक्षण सफल भएको छ । म्याग्दीको अन्नपूर्ण गाउँपालिका–४, नारच्याङमा रहेको घलेम्दी खोलामा निर्माण भएको आयोजनाको सम्पूर्ण संरचना व्यावसायिक उत्पादनका लागि तयारी अवस्थामा रहेको आयोजनाका प्रबन्धक निर्देशक प्रमोद श्रेष्ठले बताए । आयोजनाको बाँधदेखि पावरहाउससम्मको सम्पूर्ण संरचना तयार भैसकेको उनको भनाइ छ ।
१ महीना अगाडी नै परीक्षण गर्ने योजना भएपनि बाढीले इन्टेकको बाँध हुँदै टनेलभित्र प्रवेश गरेको बाढीले इन्टेक र टनेलमा क्षति पु¥याएपछि काम रोकिएको थियो । मर्मतको काम सकिएलगत्तै उपकरणको परीक्षण गरिएको आयोजनाका बिमल रिजालले बताए । १ महीना परीक्षणकै रुपमा विद्युत उत्पादन गरी नारच्याङकै घरापमा रहेको तातोपानी साना जलविद्युत हुँदै केन्द्रीय प्रसारण लाइनमा जडान गरिने छ ।
दानामा निर्माणधीन सवस्टेशनको काम सकिएपछि आयोजनाको क्षमता अनुसारको विद्युत सजिलै केन्द्रीय प्रसारण लाइनमा जडान गरिने छ । आयोजनामा उत्पादन भएको विद्युत् वर्षायाममा ४ रुपैयाँ ८० पैसा र हिउँदमा ८ रुपैयाँ ४० पैसामा प्रतियुनिटका दरले खरीद गर्ने गरी नेपाल विद्युत प्राधिकरणसँग सम्झौता भएको छ । प्राधिकरणले वार्षिक साढे १३ करोड रुपैयाँ बराबरको विद्युत खरीद गर्नेछ ।
वि.सं. २०७१ बाट निर्माण थालिएको आयोजना म्याग्दीमा व्यावसायिक विद्युत उत्पादन गर्ने पहिलो निजी क्षेत्रको जलविद्युत आयोजना हुनेछ ।