रसुवागढी–रातमाटे विद्युत् प्रसारण लाइन : लाङटाङ निकुञ्जभित्र काम गर्न वनको स्वीकृति

दुर्गा लामिछाने

काठमाडौं । नेपाल–चीन अन्तरदेशीय प्रसारण लाइन अन्तर्गत पर्ने लाङटाङ राष्ट्रिय निकुञ्जभित्र हुँदै प्रसारण लाइन संरचना निर्माण गर्न सरकारले स्वीकृति दिएको छ । प्रसारणलाइन निर्माणका लागि वन मन्त्रालय अन्तर्गतको राष्ट्रिय निकुञ्ज तथा वन्यजन्तु संरक्षण विभागले स्वीकृति दिएको हो । 

चीनको सिमाना रसुवागढीदेखि नुवाकोटको रातमाटेसम्म तानिने ४०० केभी डबल सर्किट प्रसारणलाइन उत्तरी छिमेकीसँग जोड्ने प्रयास थालिएको पहिलो प्रसारण लाइन हो । दक्षिणतर्फ भारतसँग एउटा (ढल्केवर–मुजफ्फरपुर) अन्तरदेशीय प्रसारण लाइन सञ्चालनमा रहेको छ भने दोस्रो (न्यू बुटवल–न्यू गोरखपुर) निर्माणको प्रयास भइरहेको छ । 

७० किलोमीटरको रसुवागढी–रातमाटे प्रसारण लाइन अन्तर्गत निकुञ्जभित्र पर्ने ५ किलोमीटरमा प्रसारण लाइन निर्माणका लागि नेपाल विद्युत् प्राधिकरणले विभागसँग स्वीकृति मागेको थियो । स्वीकृति पाएसँगै प्राधिकरणले निकुञ्जभित्र पर्ने बाटो, कटान गर्नुपर्ने रुख संख्या तय गर्ने लगायत अध्ययनका काम गर्न पाउने भएको छ । तर, यस कार्यमा विज्ञको संलग्नता रहनुपर्ने शर्त समेत रहेको प्रसारण प्रोजेक्ट म्यानेजर कोमलनाथ आत्रेयले जानकारी दिए । ‘अध्ययन टोलीमा वनस्पति र वन्यजन्तु विज्ञ पनि थप्नुपर्ने शर्त आएको छ,’ उनले भने, ‘तर अब निकुञ्ज प्रवेश गरी काम गर्न बाटो खुलेको छ ।’

प्रसारण लाइनको सम्भाव्यता तथा वातावरणीय अध्ययनका लागि गएको जेठ १९ गते विद्युत् विकास विभागले सर्वेक्षण अनुमतिपत्र दिइसकेको छ । बाँकी रहेको वनको स्वीकृति पर्खेर बसेको प्राधिकरण बर्खा सकिएसँगै अध्ययनका लागि जाने तयारीमा रहेको आत्रेयले बताए । ‘भीर पहरोमा काम गर्नुपर्ने भएका कारण पानी नरोकिई काम गर्न गाह्रो छ,’ उनले भने, ‘त्यसैले भदौ सकिनासाथ अध्ययन शुरू हुन्छ ।’
रसुवागढीबाट निकुञ्ज पार गरी प्रसारणलाइन चिलिमे हबमा आई जोडिन्छ र त्यसपछि रातमाटे सबस्टेसनमा पुगी टुंगिन्छ  । 

चिनियाँ टोली नेपालमा 
अन्तरदेशीय प्रसारण लाइनको विस्तृत परियोजना प्रतिवेदन (डीपीआर) निर्माणका लागि नेपाल र चीनका प्रतिनिधि संलग्न संयुक्त प्राविधिक समूह (जोइन्ट टेक्निकल टिम–जेटीजी) यसअघि नै बनेको छ । जेटीजीको बैठक तयारीका लागि छलफल गर्न चिनियाँ प्रतिनिधि गएको सोमवार नेपाल आएको आत्रेयले जानकारी दिए । ‘आइतवार सार्वजनिक हुने हाम्रो वार्षिक प्रतिवेदनबाटै धेरै तथ्यांक उपलब्ध हुने भएका कारण त्यसपछि विवरण पठाउँछौं भनी उनिहरूलाई विदा गरेका छौं,’ आत्रेयले भने, ‘सम्भवतः चाँडै नै जेटीजीको बैठक पनि बस्नेछ ।’

प्रतिक्रिया [0]