निगमको वाइडबडी भदौ १२ गतेदेखि ओशाका उड्ने निश्चित

नारिता विमानस्थलमा पुसदेखि उडान गर्ने निगमको तयारी

टीपी भुसाल

काठमाडौं । नेपाल वायुसेवा निगमले अन्ततः भदौ १२ गतेदेखि जापानको ओशाकामा सीधा उडान गर्ने भएको छ । पर्याप्त यात्रु नहुँदा निर्धारित समयमा ओशाका उडान तालिका करीब २ महीना पर सारेको निगमले उडानको सम्पूर्ण तयारी पूरा भएको जानकारी दिएको छ ।

वाइडबडी विमान (एयरबस ३३०–२००) खरीदको १ वर्षपछि निगमले यसअघि असार १९ गतेदेखि जापानको ओसाका उडान गर्ने तालिका सार्वजनिक गरेको थियो । तर, यात्रु अभावमै निगमले निर्धारित समयमा जापान उडान गर्न सकेन । निगमले  १२ वर्षअघि विमानको अभाव देखाउँदै २०६४ सालदेखि उडान बन्द गरेको थियो ।

त्रिभुवन अन्तरराष्ट्रिय विमानस्थलबाट ओशाकास्थित कान्साइ अन्तरराष्ट्रिय विमानस्थलमा मंगलवार, बिहीवार र शनिवार गरी साताको तीनओटा उडान गर्ने निगमको तालिका तय भएको निगममा मंगलवार आयोजित पत्रकार सम्मेलनमा जानकारी दिइयो । पत्रकार सम्मेलनमा निगमका कार्यकारी अध्यक्ष मदन खरेलले यात्रु अभावकै कारण स्थगित गरिएको ओसाका उडानको मिति अब नसर्ने बताए । उनले केही प्राविधिक कारण एकपटक स्थगित भएको विषयलाई सामान्यीकरण गर्न नहुने बताए । ‘हामी पूर्ण इमानदार भएर लागेका छौं । कुनै पनि गन्तव्यको कुनै पनि विमान कम्पनीको पहिलो उडानमा जहाज भरी नै यात्रु हुन्छन् भन्ने छैन । तर, हामी सकेसम्म बढी यात्रु उडाउने गरी प्रयासरत छौं ।’  उनले बिस्तारै यात्रु चाप बढ्ने अपेक्षासहित ओशाका उडानको मिति निर्धारण गरिएको सो अवसरमा जानकारी दिए । बजार अंश बढाउन विभिन्न ट्राभल एजेन्सीसँग सहकार्य गरेको बताउँदै खरेलले यसको परिणाम आउन त केही समय कुर्नैपर्ने बताए । 

उनले अहिले ५० प्रतिशतसम्म यात्रु पाए पनि १ वर्षभित्रै त्यसलाई ८० प्रतिशतभन्दा बढी पुर्‍याउने लक्ष्य रहेको बताए ।

जापान उडानका लागि ७० प्रतिशत अकुपेन्सी हुँदा खर्च धान्न सक्ने (ब्रेक इभन) अवस्था रहने सक्ने उनले बताए । २७४ सीट क्षमताको एयरबस ३३०–२०० मा १८ बिजनेश क्लास र २५६ इकोनोमी क्लासका सीट रहेका छन् ।

निगमका व्यापार निर्देशक टंक दाहालले भदौ असोजपछि पर्यटक सिजन शुरू हुने भएकाले यात्रु बढ्ने बताए । हाल पहिलो उडानका लागि १५० को हाराहारीमा टिकट बुकिङ भएको उनले जानकारी दिए । निगमले प्रमोशनल भाडादरका रूपमा शुरूको १ महीनाका लागि एकतर्फी ३६ हजार ९९९ र दुईतर्फी ७२ हजार ८१४ रुपैयाँ भाडा तय गरेको छ । निगमले काठमाडौंबाट ओशाका उडान ६ घण्टा ३० मिनेटको हुने जानकारी दिएको छ । काठमाडौंबाट बिहान २ बजेर ३० मिनेटमा ओशाकाका लागि उडेको विमान स्थानीय समयअनुसार दिनको ११ बजेर ५५ मिनेटमा ओशाका पुग्नेछ ।

ओशाकाबाट स्थानीय समय अनुसार १ बजेर ५५ मिनेटमा उडान गरी सोही दिन अपराह्न ६ बजे काठमाडौं आइपुग्नेछ । ओशाकाका सबै उडान वाइडबडी ए ३३०–२०० बाट हुने निगमले जानकारी दिएको छ । 

यस्तै निगमले पुस (जनवरी) देखि जापानकोे राजधानी टोकियोको नारिता विमानस्थलमा उडान गर्ने तयारी गरिरहेको कार्यकारी अध्यक्ष खरेलले जानकारी दिए । यसका लागि आवश्यक कामहरू भइरहेको उनले बताए । 

नेपाल र जापानबीच गत असारमा २५ वर्षपछि हवाई सेवा सम्झौता पुनरवलोकन भएको थियो । हवाई सम्झौतासँगै नेपाल र जापानबीच सातामा १४ ओटासम्म उडान गर्न पाउने सहमति छ । नयाँ सम्झौतामा जापानको हानेडा विमानस्थलबाहेक सबै विमानस्थलमा उडान गर्न पाउने उल्लेख छ । दुईओटा वाइडबडी विमान खरीद गरेर पनि निगमले पुरानै र छोटा दूरी अर्थात् नयाँदिल्ली, मुम्बई, बैंगलोर, क्वालालम्पुर, बैंकक, हङकङ, दोहा र दुबईमा उडान गर्दै आएको छ । जापान गन्तव्यपछि निगमका वाइडबडीले काम पाउने भएका छन् भने निगमको व्यापार बढ्ने निगमको अपेक्षा छ ।

प्रतिक्रिया [0]