हवाई नियामक निकायका महानिर्देशकहरुको सम्मेलन सम्पन्न, हवाई क्षेत्रका समस्याको साझा समाधान खोज्नुपर्ने निष्कर्ष

टीपी भुसाल

भदौ ८, काठमाडौं । हवाई क्षेत्रले भोग्नुपर्ने समस्याको साझा समाधान खोज्नुपर्ने निष्कर्षसहित अन्तरराष्ट्रिय नागरिक उड्ययन संगठन (आईकाओ) एशिया प्यासिफिक क्षेत्रका हवाई नियामक निकायका महानिर्देशकहरुको ५६ औं सम्मेलन काठमाडौंमा सम्पन्न भएको छ । सम्मेलनले विश्वमा बढ्दो हवाई यातायातलाई सुरक्षित, भरपर्दो र विश्वसनिय बनाउन हवाई सुरक्षा तथा क्षेत्रीय सहकार्यमा जोड दिएको छ ।

सम्मेलनको गत आइतवार प्रधानमन्त्री केपी शर्मा ओलीले उद्घाटन गर्नुभएको थियो । ‘क्षमताको सीमितता सम्बोधनको लागि साझा प्रयास’ भन्ने नारासहित शुरु भएको सम्मेलनमा वर्षभरि आ–आफ्नो देशले हवाई क्षेत्रमा गरेका कार्यहरूको मूल्यांकन गरी आगामी दिनमा गर्नुपर्ने सुधार तथा नीतिगत व्यवस्थाका बारेमा छलफल भएको थियो । सम्मेलनमा १२ एजेन्डामा ५४ कार्यपत्र र ४८ जानकारी पत्रमाथि छलफल भएको नेपाल नागरिक उड्ययन प्राधिकरणले जानकारी दिएको छ । सम्मेलनमा नेपालले नागरिक उड्डयन सुरक्षामा बढ्दो चुनौती लगायतका विषयमा कार्यपत्र प्रस्तुत गरेको थियो ।

यस सम्मेलनमा छलफल गरी तय भएका विषयहरूलाई आगामी अक्टोबरमा थाइल्यान्डको बैंककमा हुने महासभा सम्मेलनमा पेश गरिने प्राधिकरणका महानिर्देशक राजन पोख्रेलले जानकारी दिए । सम्मेलनमा (आईकाओ) प्रमुख डा.ओलुमोयीवा बनार्ड अल्यू लगाएत विश्वका ४३ देशका ४०० प्रतिनिधिले भाग लिएको प्राधिकरणले जानकारी दिएको छ । आईकाओले विश्वमा सुरक्षित, नियमित र प्रभावकारी नागरिक उड्डयनका लागि उड्डयन सम्बन्धी नियम, मापदण्ड, सिफारिस, मार्गदर्शन र सर्कुलर आदि जारी गर्ने गर्दछ । यसकै आधारमा सदस्य राष्ट्रहरूले नागरिक उड्डयनसम्बन्धी नियम, कानून, निदेर्शिका तथा कार्यविधी तर्जुमा गरी लागू गर्छन् । आईकाओमा १९३ मुलुक सदस्य छन् ।

नेपालले यसअघि सन् १९७८ मा १४औं र १९९८ मा ३४औं सम्मेलन आयोजना गरेको थियो । नेपालले ५७ औं सम्मेलनको आयोजकको जिम्मा बंगलादेशको ढाकालाई दिइएको छ । आगामी सम्मेलन सन् २०२० को नोभेम्बरमा ढाकामा आयोजना हुनेछ ।

नेपालले सम्मेलनकै अवसरमा विभिन्न ‘साइडलाइन वार्तासमेत गरेको छ । जसमा नेपालको आकाश हुँदै अन्तरराष्ट्रिय उडानहरू गर्न सकिने ‘हिमालय–२ रूट’को प्राविधिक विषयमा थप छलफल गर्न म्यानमा (बर्मा) सँग तथा अन्य हवाई रुटका विषमयमा भारतीय नागरिक उड््ड्न अधिकारीसँग पनि छलफल गरेको छ । ‘हिमालय–२ रूट’को प्राविधिक विषयमा थप अध्ययन गर्न म्यानमा सहमत भएको छ । म्यानमाको केही खास क्षेत्रमा सञ्चार तथा निगरानी (कम्युनिकेशन एण्ड सर्भिलेनस) को राम्रो व्यवस्था नहँुदा कार्यान्वयनमा अन्यौल देखिएको यो रुटको विषयमा आगामी दिनमा म्यानमाले नेपाललाई छलफलको लागि आमन्त्रण गर्ने प्राधिकरणले जानकारी दिएको छ ।

यस्तै नेपाल भारत बीच भएका पछिल्ला नागरिक उड््यन वार्ता र हवाई रुटका विषयमा पनि भारतीय पक्षसँग छलफल भएको प्राधिकरणले जानकारी दिएको छ । नेपालले गौतमबुद्ध र पोखरा अन्तरराष्ट्रिय विमानस्थलको निर्माण गरिरहेको सन्र्दभमा भारतसँग भएको साइडलाईन वार्तालाई पनि महत्पवूर्ण मानिएको छ ।

प्रतिक्रिया [0]