बैंकर्स संघद्वारा तुरुन्तै ब्रोकरेज लाइसेन्स दिन नेप्सेलाई अनुरोध 

औसत ब्याजदर अन्तर गणना विधि संशोधन गर्न फेरी सुझाव

ममता थापा

भदौ ११, काठमाडौं । नेपाल स्टक एक्सचेन्जले प्रक्रिया पुर्‍याएर निवेदन दिएका बैंकहरुलाई लाइसेन्स दिन रोक लगाएपछि नेपाल बैंकर्स संघले यसो नगर्न अनुरोध गर्ने भएको छ । संघको बुधवार  बसेको समितिको बैंठकले यस्तो अनुरोध गर्ने निर्णय गरेको हो । 

सबै प्रक्रिया पूरा गरेका बैंकले आन्तरिक तयारी सकाए पनि लाईसेन्स दिन रोकेको संघले बताएको छ । यसअघि संसदको साउन २९ गते बसेको अर्थ समितिको बैठकको निर्णयअनुसार समग्र पूँजी बजारको बारेमा अध्ययन गरी २ महीनाभित्र प्रतिवेदन तयार पार्न रामकुमारी झाँक्रीको संयोजकत्वमा उप समिति गठन गरेपछि नेप्सेले ब्रोकर लाईसेन्समा रोक लगाएको हो । 
  
यसैगरी नेपाल बैंकर्स संघले विगत केहि समयदेखि बैंकिङ क्षेत्रको बारेमा केहि मिडियाहरुले नकरात्मक, बैंकका कर्मचारीहरुको मान–मर्यादामा ठेस पुग्ने गरी कपोकल्पित समाचार प्रकाशन गरेको प्रति आपत्ति जनाएको छ । यस्ता बैंकिङ क्षेत्रको भ्रामक समाचारका विषयमा संघले प्रेस काउन्सिल नेपालसँग समन्वय गर्ने निर्णय गरेको छ ।

यसैगरी संघले औसत ब्याजदर अन्तर गणना गर्ने विधि लगायतकाबारे संशोधन गर्न फेरी नेपाल राष्ट्र बैंकलाई अनुरोध गर्ने भएको छ । यसअघि भने उक्त व्यवस्थाले गर्दा बैंकिङ क्षेत्र तथा समस्त अर्थतन्त्रमा नकारात्मक प्रभाव पार्ने भन्दै संघले राष्ट्र बैंकलाई लिखित रुपमा जानकारी गराएको थियो ।

यसपछि केन्द्रिय बैंकका उच्च पदाधिकारीहरुका साथ यस विषयमा छलफलपछि समझदारी भएको संघको भनाइ छ । समझदारीपछिको तोकिएका प्रावधानहरुमा संसोधन गर्न फेरी  अनुरोध गर्ने निर्णय गरेको संघले जानकारी दिएको छ ।

प्रतिक्रिया [0]