मुस्ताङ गेटको कालीगण्डकी मोटरेबल पुल बन्यो, अब उपल्लो मुस्ताङमा बाह्रै महीना गाडी गुड्ने

ध्रुवसागर शर्मा

भदौ १६, म्याग्दी । हिमालपारीको पर्यटकीय जिल्ला मुस्ताङको लोमान्थाङसम्म अब बाह्रै महीना सवारीसाधन सञ्चालन हुने भएको छ । उपल्लो मुस्ताङको बारागुङ मुक्तिक्षेत्र गाउँपालिकाको छुसाङस्थित मुस्ताङ गेटको कालीगण्डकी मोटरेबल पुल निर्माण सम्पन्न भई सोमवारदेखि सञ्चालनमा आएपछि काठमाडौं, पोखरा, बेनी लगायतका ठाउँबाट आएका सवारीसाधन सिधै लोमान्थाङ पुग्न सक्ने भएका हुन् ।

निर्माणाधीन पुललाई गत साउनमा कालीगण्डकीमा आएको बाढीले क्षति पुर्‍याएपछि निर्माण अवरुद्ध बनेको थियो । पुलको संरचना निर्माण भएपछि ३ ओटा डोजर परिचालन गरी १२ दिनमा पुलको दुईतर्फी ट्रयाक खोलिएको करिडोर सडक आयोजना प्रमुख मुकुन्द अधिकारीले जानकारी दिए । उपल्लो मुस्ताङ जोड्ने कालीगण्डकी पुल सञ्चालनमा आएपछि कोरला नाका र उपल्लो मुस्ताङ जाने सवारी साधनलाई सहज भएको यातायात व्यावसायीहरुले बताएका छन् । पक्की पुल बनेकाले अब बाह्रै महीना निर्वाध सवारीसाधन उपल्लो मुस्ताङ जानसक्ने मुस्ताङ  उद्योग वाणिज्य संघका अध्यक्ष खगेन्द्र तुलाचनले बताए । उनका अनुसार मुस्ताङ गेटको पुल र लुप्रापान्डा खोला पुल सञ्चालनमा आए पनि कागबेनीमा निर्माणधीन २५ मीटर लामो पुल निर्माणमा भने ढिलाई भएको छ ।

मुस्ताङ गेटमा सञ्चालनमा आएको पक्की पुलको काम लोकल रोड ब्रिज प्रोग्राम एलआरबीपीले २०७१ सालमा शुरु गरेको हो । रू. ४ करोड ७३ लाख लागत रहेको उक्त पुलको लम्बाइ ७६ मीटर छ । सोमवार कालीगण्डकी कोरिडोर, स्थानीय जनप्रतिनिधि र मुस्ताङ प्रशासनका पदाधिकारीहरुको उपस्थितिमा पुलको उद्घाटन गरिएको हो ।

प्रतिक्रिया [0]