टानको निर्वाचनमा दुई पक्षको उम्मेदवारी घोषणा, संस्था नवीकरण नै नगरी निर्वाचनमा जाँदै टान

टीपी भुसाल

भदौ १६, काठमाडौं । ट्रेकिङ एजेन्सिज एशोसिएशन अफ नेपाल (टान)को भदौै २० गते हुने निर्वाचनको लागि दुई पक्षले उम्मेदवारी घोषणा गरेका छन् । सोमवार दुवै पक्षले राजधानीका अलग–अलग स्थानमा कार्यक्रम गरी उम्मेदवारी घोषणा तथा प्रतिवद्धता सार्वजनिक गरेका हुन् ।

टानको ४१ औं वार्षिकोत्सव तथा साधारणसभामा लोकतान्त्रिक पक्षको नेतृत्व खुम बहादुर सुवेदीले गरेका छन् भने वामपन्थी पक्षको नेतृत्व अञ्जन थापा (कुमार)ले गरेका छन् । सुवेदीको समूहको वरिष्ठ उपाध्यक्षमा नविन त्रिताल, प्रथम उपाध्यक्षमा चोलेन्द्र बहादुर कार्की, द्वितिय उपाध्यक्षमा भरत सापकोटा, महासचिवमा कर्मा शेर्पा, सचिवमा प्रदीप कुमार घिमिरे र कोषाध्यक्षमा ऋतु ग्यामदान, सह–कोषाध्यक्षमा सूर्यकुमार श्रेष्ठले उम्मेदवारी दिएका छन् ।

यस्तै वामपन्थी समूहको तर्फबाट वरिष्ठ उपाध्यक्षमा ऋषि प्रसाद नेपाल, प्रथम उपाध्यक्षमा प्रकाशचन्द्र देवकोटा, द्वितिय उपाध्यक्षमा तेञ्जिङ शेर्पा, महासचिवमा सरिता लामा, सचिवमा दामोदर ढकाल, कोषाध्यक्षमा टेक बहादुर खकुराल र सह–कोषाध्यक्षमा प्रदीप पण्डितले उम्मेदवारी दिएका छन् । १७ सदस्यीय कार्यसमितिमा अन्य १०–१० जनाले सदस्यमा उम्मेदवारी घोषणा गरेका छन् ।

खुम सुवेदीको पक्षले पर्यटन विकास र व्यावसायिक उन्न्नतिका लागि ३१ बुँदे प्रतिवद्धता सार्वजनिक गरेको छ । प्रतिवद्धतामा टानको संस्थागत सुदृढीकरण, पर्वतीय पर्यटन पूर्वाधार विकास तथा व्यावसायिक हीतका कुरा समावेश गरिएको छ । यस्तै थापा समूहले पनि गुणस्तरीय तथा साहसिक पर्यटन, पदयात्री सूचना व्यवस्थापन प्रणाली (टिम्स)को रकमको सही सदुयपोग तथा टान अस्पताल निर्माण लगायतका एजेन्डा अघि सारेको छ । सुवेदी वर्तमान कार्य समितिमा वरिष्ठ उपाध्यक्ष हुन् भने थापा पूर्व कोषाध्यक्ष हुन् ।  
 
संस्था नवीकरणै नगरी निर्वाचन
संस्थाले ४१ औं अधिवेशन गर्ने तयारी भइरहँदा टान आफैं भने जिल्ला प्रशासन कार्यालयमा नवीकरण समेत हुन सकिरहेको छैन । टानले आम्दानी करबापतको रू. १ करोड ८५ लाख कर सरकारलाई नतिरेका कारण आव २०७४/७५ देखि नै नवीकरण भएको छैन । तर यस विषयमा टानका अध्यक्ष नवराज दाहालले भने संस्था नवीकरण भएको र अन्य विषयमा पनि समन्वय भइरहेको बताउँदै आएका छन् ।

यस्तै नयाँ कार्यसमितिको अध्यक्षका दुवै जना प्रत्यासीले पनि यो विषयलाई मिलाउन नेतृत्व लागिरहको बताउँदै चुनावी मैदानमा उत्रिएका छन् । जिल्ला प्रशासन कार्यालय काठमाडौंले टिम्स विक्रीबापत लिएको शुल्कको २५ प्रतिशत हुन आउने आम्दानी राजस्व नबुझाएका कारण नवीकरण गरेका छैन । टानले नेपाल पर्यटन बोर्डसँग टिम्स कार्ड खरिदविक्री गर्दै आएको छ । टानमा देशभरका गरी करीब २ हजार ट्रेकिङ कम्पनी आवद्ध छन् ।

प्रतिक्रिया [0]