विशिष्ट व्यक्तिहरुको विमानस्थल प्रवेशमा नयाँ मापदण्ड लागू, त्रिभुवन अन्तरराष्ट्रिय विमानस्थलको ९५% क्षेत्रफल सीसीटीभी कभरेजमा

टीपी भुसाल

भदौ ३१, काठमाडौं । त्रिभुवन अन्तरराष्ट्रिय विमानस्थलले विमानस्थलमा विशिष्ट व्यक्तिको मापदण्ड लागू गरेको छ । अबदेखि विमानस्थलको आन्तरिक उडान तर्फ छ अतिविशिष्ट व्यक्तिहरू राष्ट्रपति, उपराष्ट्रपति, प्रधानमन्त्री, प्रधानन्यायाधीश, प्रतिनिधिसभाका सभामुख र राष्ट्रियसभाका अध्यक्षको सवारी साधनलाई मात्र विमानस्थलको भित्रि भागमा प्रवेश दिइने भएको छ । यो सुविधा सोही मर्यादामा रहका विदेशी समकक्षीहरुलाई पनि लागू हुने विमानस्थल कार्यालयले जानकारी दिएको छ ।

विमानस्थलमा हुने विशिष्ट व्यक्तिहरुको आगमनलाई व्यवस्थित गर्न पर्यटन मन्त्री योगेश भट्टराइको निर्देशन अनुरुप नयाँ मापदण्ड लागू गरिएको विमानस्थल कार्यालयको भनाइ छ । हालको मापदण्ड परिमार्जन गरी अतिविशिष्ट व्यक्तिको सवारी साधन मात्र जहाजको ढोका नजिक पुग्ने व्यवस्था मिलाइएको हो । पर्यटनमन्त्री भट्टराइले केही दिन अघि सार्वजनिक गरेको प्राथमिकतायुक्त कार्ययोजनामा यो विषय पनि समावेश थियो ।

पहिले मन्त्रीहरु समेत आफ्नो सवारी साधन लिएर विमानस्थलमा जहाजको ढोका नजिक जाने गर्दथे । यद्यपि नागरिक उड्ड्यन सुरक्षा मापदण्डका आधारमा मन्त्रीहरुलाई जहाजको ढोकासम्म जाने अनुमति भने थिएन । विमानस्थल कार्यालयले व्यावहारिकताको आधारमा भन्दै त्यसमा छुट दिएको थियो । अब भने छ अतिविशिष्ट बाहेकका विशिष्ट पाहुनाको हकमा वायुसेवाले उपलब्ध गराउने सवारी साधनबाटै जहाजसम्ममा आउने जाने व्यवस्था मिलाइएको विमानस्थलले कार्यालयले जानकारी दिएको छ । यस्तै विमानस्थलबाट सञ्चालन हुने सवारी साधनमा जीपीएस प्रणाली लागू गरिनुका साथै चालकलाई आतिथ्य संस्कारबारे तालीम दिइने भएको छ ।

३४५ ओटा सीसीटीभी क्यामेराबाट विमानस्थलको निगरानी
त्रिभुवन अन्तरराष्ट्रिय विमानस्थलको समग्र सुरक्षा सुधारको लागि विमानस्थल कार्यालयले ३४५ ओटा सीसीटीभी क्यामेरा जडान गरेको छ । यसबाट विमानस्थलको महत्वपूर्ण ९५ प्रतिशत क्षेत्रफल सीसीटीभीको कभरेजमा आएको विमानस्थल कार्यालयले जानकारी दिएको छ । विमानस्थलका अनुसार अब छिट्टै थप १०० सीसीटीभी क्यामेरा जडान गरिने छ । यस्तै १ वर्ष भित्र अर्को थप १०० सीसीटीभी जडान गरिने छ । जसबाट विमानस्थलको सतप्रतिशत क्षेत्रफल क्यामराको निगरानीमा रहने विमानस्थल कार्यालयका महाप्रबन्धक राजकुमार क्षेत्रीले जानकारी दिए ।

विमानस्थलको सुरक्षा व्यवस्थापनको बारेमा जानकारी दिन सोमवार विमानस्थलमा आयोजित पत्रकार सम्मेलनमा लगेज÷ब्यागेज फुट्ने तथा चोरी हुने सबै काम त्रिभुवन विमानस्थलमै भएको भन्ने गुनासो समाधान भएको उनले बताए । ‘लगेज÷ब्याजेज फुट्ने तथा चोरी हुने काम यहाँ हँुदै भएन भन्ने होइन । यहाँभन्दा विदेशस्थित विमानस्थलमै बढी हुने गरेको पाइएको छ,’ उनले भने । त्रिभुवन विमानस्थलमा त्यस्तो घटनामा संलग्न कर्मचारीलाई कडा कारबाही गरिने बताउँदै उनले यस्ता घटना कम गर्न सीसीटीभीको माध्यमबाट निगरानी बढाइएको जानकारी दिए ।

पछिलो समय विमानस्थलमा यात्रुहरुबाट परेका यस्तै ५५ ओटा उजुरीमध्ये ४५ ओटाको र विदेशी विमान कम्पनीबाट आएका यस्तै २७ गुनासोमध्ये २२ ओटा गुनासा समाधान भएको उनले बताए । यात्राका क्रममा अन्तिम गन्तव्य नेपाल हुन आउने अवस्थामा यात्रुहरुले यही नै लगेज फुटाउने जस्ता काम भएको गुनासो गरेपनि अनुसन्धान गर्दा त्यो काम विदेशी विमानस्थलहरुमै भएको पाइएको उनको दाबी छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस