गौतमबुद्ध अन्तरराष्ट्रिय विमानस्थल सञ्चालन : म्युनिख एयरपोर्टलाई दिने तयारी

टीपी भुसाल

काठमाडौं । सरकारले गौतमबुद्ध अन्तरराष्ट्रिय विमानस्थल सञ्चालनको जिम्मा जर्मनीको म्युनिख इन्टरनेशनललाई दिने तयारी गरेको छ । जर्मन सरकारको २६ प्रतिशत स्वामित्व रहेको म्युनिख एयरपोर्टको प्रस्तावमाथि अध्ययन गरिरहको पर्यटन मन्त्रालयले जानकारी दिएको छ । 

गत जेठ १६ गतेको मन्त्रिपरिषद् बैठकले गौतमबुद्ध अन्तरराष्ट्रिय विमानस्थल खुला प्रतिस्पर्धाबाट नभई दुई सरकारबीचको सम्झौताबाट ‘जीटुजी’ मोडेलमा सञ्चालन गर्ने निर्णय गरेको थियो । जर्मन सरकारको स्वामित्वको उक्त कम्पनीले विमानस्थल सञ्चालनका लागि पर्यटन तथा नागरिक उड्डयन मन्त्रालय र नियामक निकाय नेपाल नागरिक उड्डयन प्राधिकरणलाई गत असारमा औपचारिक प्रस्ताव पठाएको थियो । म्युनिखले गौतमबुद्ध विमानस्थल ५० वर्षका लागि सञ्चालनको जिम्मा दिन प्रस्ताव गरेको छ ।

यो प्रस्तावमाथि मन्त्रालयले अध्ययन गरिरहेको पर्यटन मन्त्री योगेश भट्टराईले जानकारी दिए । ‘सरकारले जीटुजी मोडलबाट विमानस्थल सञ्चालनको निर्णय गरेपछि म्युनिख एयरपोर्टको प्रस्ताव आएकोले त्यसमाथि मन्त्रालयले छलफल गरेको छ । सम्भवतः यस विषयमा सरकारले छिट्टै निर्णय गर्ने छ,’ मन्त्री भट्टराईले भने । विमानस्थल सञ्चालनका लागि हालसम्म जर्मनीबाहेक अन्य मुलुकबाट प्रस्ताव नआएकोले उसैले पाउने सम्भावना बढी रहेको मन्त्रालयका अधिकारी बताउँछन् । यद्यपि, त्यसबारेमा अहिले नै अन्तिम निर्णय भने भइनसकेको उनीहरूको भनाइ छ । 

नेपालस्थित जर्मन राजदूतावास मार्पmत पर्यटन मन्त्रालय र प्राधिकरणलाई गौतमबुद्ध विमानस्थल सञ्चालनका लागि प्रस्ताव आएको थियो । यस विषयमा जर्मनीका राजदूतले मन्त्रालयका अधिकारीहरूसँग छलफल गरिसकेका छन् । विमानस्थल सञ्चालनको जिम्मेवारी दिने विषयमा पर्यटन मन्त्रालयले मन्त्रालयका सहसचिवको नेतृत्वमा समिति गठन गरेर अध्ययन गरिरहेको छ । समितिमा नागरिक उड्डयन प्राधिकरण, कानून, न्याय तथा संसदीय मामिला, परराष्ट्र लगायत मन्त्रालयको प्रतिनिधि सहभागी छन् ।

समितिले प्रस्तावमाथि छलफल गरी त्यसको मूल्यांकन गर्ने तथा सरकारलाई सिफारिश गर्ने छ ।

गौतमबुद्ध विमानस्थल सन् २०१९ को डिसेम्बर महीनासम्म निर्माण सम्पन्न गरी सन् २०२० को मार्च महीनामा उक्त विमानस्थलबाट उडान शुरू गर्ने मन्त्री भट्टराईले बताए । ‘पहिले पूर्वाधार निर्माणको काम सकिनेछ । त्यसपछि ‘उडान कार्यविधि, अन्तरराष्ट्रिय नागरिक उड्डयन संगठन (आइकाओ) को सहमति, विमानस्थल प्रमाणितपछि मात्रै परीक्षण उडान र व्यावसायिक उडान शुरू गर्ने सरकारको योजना छ । त्यसबीचमा विमानस्थल सञ्चालनको जिम्मा दिने विषयमा पनि निर्णयमा पुगिनेछ,’ उनले भने ।

हाल सो विमानस्थलको भौतिक प्रगति ८३ प्रतिशतभन्दा माथि रहेको प्राधिकरणले जानकारी दिएको छ । विमानस्थलमा अहिलेसम्म पार्किङ क्षेत्रको काम, ओभरहेड ट्याङ्की, प्रशासनिक भवन र धावनमार्गको काम सकिएको छ भने कन्ट्रोल टावर, अन्तरराष्ट्रिय टर्मिनल भवन लगायतको काम करीब करीब सकिएको छ । 

रू. ६ अर्ब २२ करोडमा चीनको सरकारी कम्पनी नर्थवेस्ट सिभिल एभिएशन एयरपोर्ट कन्स्ट्रक्शन ग्रूपले ठेक्का लिएकोे विमानस्थल सन् २०१७ डिसेम्बरसम्ममा सम्पन्न गर्नुपर्ने थियो । मधेश आन्दोलन, भारतको नाकाबन्दी, नदीजन्य निर्माण सामग्रीको अभाव लगायतका कारण पटकपटक म्याद थप्दै अब निर्माण सम्पन्न गर्ने मिति यसै वर्षको डिसेम्बर पु¥याइएको छ । विमानस्थल निर्माणको केही बाँकी काम सम्पन्न गर्न असारमा तेस्रोपटक समयावधि थपिएको थियो  ।

प्रतिक्रिया [0]