रूप ज्योति पक्राउ प्रकरण : निजीक्षेत्रको आपत्ति

नेपाल चेम्बरले गर्‍यो विरोध

मिलन विश्वकर्मा

काठमाडौं । ज्योति समूहका उपाध्यक्ष तथा पूर्व अर्थ राज्यमन्त्री रूप ज्योति पक्राउलाई लिएर निजीक्षेत्रका व्यावसायिक संगठनहरूले आपत्ति  व्यक्त गरेका छन् । अपराध नै प्रमाणित नभई मात्र उजुरीको भरमा यसरी पक्राउ गर्न नहुने भन्दै नेपाल चेम्बर अफ कमर्शले आधिकारिक रूपमै यसको विरोध गरेको छ । 

मुलुकको औद्योगिक क्षेत्रमा ठूलो लगानी गरेर नियमित रूपमा राजस्वमा योगदान गरिरहेका उद्यमीलाई अमर्यादित व्यवहार गर्दा निजीक्षेत्र मर्माहित भएको चेम्बरको भनाइ छ । नेपाल उद्योग वाणिज्य महासंघ तथा नेपाल उद्योग परिसंघले आफ्नो आधिकारिक धारणा बाहिर नल्याइसके पनि यी दुई संस्थासँग आबद्ध व्यवसायीहरू पनि ज्योति पक्राउ गर्ने प्रहरीको कदमसँग असन्तुष्ट रहेका छन् । 

महासंघले भने यस घटनाबारे आज (आइतवार) आधिकारिक धारणा सार्वजनिक गर्ने तयारी गरेको छ । यसका लागि आज बिहान महासंघको कार्यसमितिको बैठक बोलाइएको छ । 

महासंघका वरिष्ठ उपाध्यक्ष शेखर गोल्छाले भने, ‘यस घटनाप्रति महासंघको आधिकारिक धारणा आइतवार सार्वजनिक गर्नेछौं । मेरो व्यक्तिगत रूपमा भन्नु पर्दा, कुनै एउटा व्यक्तिले गरेको अपराधमा सबैलाई पक्राउ गर्नु न्यायोचित होइन । यस घटनाले नेपालमा निजीक्षेत्रको सम्मान नभएको प्रमाणित गरेको छ ।’

नेपाल उद्योग परिसंघका अध्यक्ष सतीशकुमार मोरले पनि यस विषयप्रति असन्तुष्टि व्यक्त गरे । ‘यो कानूनी प्रक्रियाको कुरा हो । तर, रूप ज्योतिमाथि अन्याय भएकोजस्तो लाग्छ,’ उनले भने, ‘कानूनी प्रक्रियामा नै आवश्यक सुधार गर्न आवश्यक छ ।’

महानगरीय प्रहरी परिसर टेकुले ज्योति सिंगापुरबाट फर्कने क्रममा उनकी छोरी सुरुचिसहित त्रिभुवन अन्तरराष्ट्रिय विमानस्थलबाट बिहीवार साँझ पक्राउ गरेको थियो । प्रहरीका अनुसार छोरी सुरुचिलाई पनि अदालतकै आदेशअनुसार पक्राउ गरिएको हो ।

यसैबीच जिल्ला अदालत काठमाडौंले शुक्रवार उनीहरूलाई तीन दिन हिरासतमा राखेर थप अनुसन्धान गर्न अनुमति दिइसकेको छ । प्रहरीले भने अनुसन्धान गर्नका लागि ७ दिनको समय मागेको थियो । परिसरका प्रवक्ता होविन्द्र बोगटीले भने, ‘हामीले अनुसन्धान गर्नका लागि अदालतबाट ३ दिनको समय पाएका छौं । अहिले आवश्यक बयान लिने लगायतका कामहरू भइरहेका छन् ।’

जग्गा कारोबारमार्फत रू. १ करोड ३६ लाख ७५ हजार ठगी गरेको भन्दै विज्ञेन्द्रकृष्ण मल्लले २०७५ मङ्सिर १६ गते उनीहरूविरूद्ध  प्रहरीमा जाहेरी दिएका थिए । सोही आधारमा जिल्ला अदालत काठमाडौंले गत मङ्सिरमा नै उनलाई पक्राउ गर्न अनुमति दिएको थियो । त्यसविरुद्ध ज्योतिले २०७५ मङ्सिरमा नै सर्वोच्चमा रीट दिएका थिए । तर, गत बुधवार सर्वोच्चले उनको विपक्षमा फैसला सुनाउँदै पक्राउ गर्न प्रहरीलाई आदेश दिएको थियो । त्यसपछि प्रहरीले उनलाई पक्राउ गरेको थियो । 

मल्लले ज्योतिसहित १० जना विरूद्ध जाहेरी दिएका थिए । तर, प्रहरीले उनीहरू दुई जनालाई मात्र पक्राउ गरेको छ । प्रवक्ता बोगटीका अनुसार अन्य आरोपीको पनि खोजी भइरहेको छ ।

प्रतिक्रिया [4]

---

---

---

---

पुरा नाम: *

इमेल: *

प्रतिकृया: *
पठाउनुहोस