बाँकी कार्यकाल पनि प्रधानमन्त्रीमा ओलीको निरन्तरता, पार्टीको कार्यकारी अधिकार प्रचण्डलाई

मन्त्रीमण्डल पुर्नगठन भएन

टीपी भुसाल

मंसिर ४, काठमाडौं । सत्तारुढ दल नेपाल कम्युनिष्ट पार्टी (नेकपा)ले प्रधानमन्त्रीको बाँकी कार्यकाल केपी शर्मा ओलीलाई नै निरन्तरता दिने निर्णय गरेको छ । नेकपाले अर्का अध्यक्ष पुष्पकमल दाहाल (प्रचण्ड) लाई पार्टीको कार्यकारी अध्यक्षको जिम्मेवारी दिने निर्णय गरेको छ । नेकपाको यो निर्णयसँगै ओली र प्रचण्ड आलोपालोमा प्रधानमन्त्री हुने भनिएको यसअघिको सहमतिले नयाँ मोड लिएको छ । कतिपयले प्रधानमन्त्री ओलीको पछिल्लो स्वास्थ्य अवस्थाको कारण प्रधानमन्त्री पद ढिलो चाँडो प्रचण्डलाई सुम्पिने अड्कल गरेका थिए । तर अड्कल विपरित प्रधानमन्त्री ओलीले सत्ताको बागडोर आफैले राख्ने गरी नयाँ सहमति गराउन सफल हुनुभएको छ ।

मंगलवार बसेको सचिवालय बैठकले अब प्रचण्डलाई पार्टीको काममा केन्द्रित हुने गरी जिम्मा दिएको छ । प्रधानमन्त्रीको हैसियतमा ओली सरकारको काममा केन्द्रित हुने र प्रचण्ड कार्यकारी अधिकारसहित पार्टी काममा लाग्ने निर्णय भएको नेकपाका प्रवक्ता नारायणकाजी श्रेष्ठले जानकारी दिए । ‘प्रतिनिधि सभाको यस कार्यकालमा सरकारको नेतृत्व केपी ओलीले गर्ने,आमरूपमा बैठकको अध्यक्षता र सञ्चालन प्रचण्डले गर्ने, र राजनीतिक स्थायित्वको सन्देश दिने निर्णय भएको छ,’ श्रेष्ठले भने । ‘प्रवक्त श्रेष्ठले पार्टी सरकार र सरकार सञ्चालनमा अध्यक्षद्वयले समन्वय गर्ने बताए । केपी शर्मा ओली र प्रचण्डको वरियता क्रम यथावत राखिएको छ ।

मन्त्रीमण्डल पुर्नगठन भएन
यसबीच प्रधानमन्त्री ओलीले बुधवार नै मन्त्रिपरिषद् विस्तार गर्ने तयारी गर्नु भएको थियो । तर हालसम्म हटाउने मन्त्री र नयाँ बन्ने मन्त्रीहरुको टुंगो लागिसकेको छैन । करीब एक सातादेखि मन्त्रिपरिषद हेरफेर गर्ने भनेर पार्टी र प्रधानमन्त्रीबाटै सूचना बाहिर आएपनि मन्त्रिपरिषद पुनर्गठनमा ढिलाई भएको छ । पार्टीले यसबारे निर्णय गर्ने जिम्मा दुई अध्यक्षलाई दिएको छ ।

मन्त्रिमण्डल पुनर्गठन गर्ने भन्दै केही मन्त्री हटाउने सूचना बाहिर आएपछि बहालवाला मन्त्रीहरु मनोवैज्ञानिक तनावमा रहेका छन् । उनीहरु न त आफ्नो काममा पहिले जस्तो सक्रिय भएका छन्, न त आफ्नो बारेमा के हुने भन्ने विषयमा प्रतिक्रिया नै दिएका छन् । पार्टी स्रोतका अनुसार नयाँ मन्त्रीहरुको बुधवार रातिसम्ममा टुंगो लाग्ने तर सपथग्रहण भने बिहिवार मात्रै हुने छ ।

प्रतिक्रिया [0]