अन्तरप्रदेश उडानका लागि निजी विमान कम्पनीको अग्रसरता

अनुदान दिने कार्यविधि बनाउँदै पर्यटन मन्त्रालय 

टीपी भुसाल रोशनी भट्टराई

काठमाडौं । सरकारले अन्तरप्रदेश हवाई उडान प्रोत्साहनका लागि अनुदान दिने तयारी गरेसँगै निजी विमान कम्पनीहरूले यस्तो सेवा थाल्न अग्रसरता देखाएका छन् । सोमवार बुद्ध एयरले आगामी जनवरी १ देखि प्रदेश १ बाट प्रादेशिक हवाई उडान गर्ने तयारी गरेको जानकारी दिएको छ ।

बुद्ध एयरले हाललाई पहिलो चरणमा काठमाडौंलाई ट्रान्जिट बनाएर भद्रपुर विराटनगरबाट पोखरा उडान गर्ने तयारी गरेको प्रबन्ध निर्देशक वीरेन्द्रबहादुर बस्नेतले जानकारी दिए । प्रादेशिक उडानबारे विराटनगरमा जानकारी दिँदै उनले परीक्षणस्वरूप साताको ३ दिन सञ्चालन गर्ने बताए । काठमाडौं ट्रान्जिट उडानको अवस्था हेरी सीधै पोखरा उडानको तयारी गरिने बस्नेतले बताए । 

हाल प्रदेश ५ भैरहवाबाट गण्डकी प्रदेशको पोखरा र पोखराबाटै प्रदेश ३ चितवनमा मात्र अन्तर प्रदेश उडान भइरहेको छ । यती एयरलाइन्सले पोखरालाई ‘बेस’ बनाएर भैरहवा र भरतपुर विमानस्थलमा तथा माउन्टेन प्mलाइट सेवा सञ्चालन गरेको छ । क्षेत्रीय विमानस्थललाई प्रयोगमा ल्याउन र प्रादेशिक संरचनाअनुसार सेवा प्रवाह गर्न पोखरालाई ‘बेस’ बनाइन लागेको यती एयरलाइन्सका प्रवक्ता भीमराज राईले बताए । स्थानीय बासिन्दा, आन्तरिक÷बा≈य पर्यटक र नेपाल भ्रमण वर्ष–२०२० लाई लक्षित गरी यो योजना ल्याएको उनको धारणा छ ।

मुलुक संघीय संरचनामा गएको तथा प्रत्येक प्रदेशमा हवाई पूर्वाधार विकासको काम अघि बढाइएकाले अन्तरप्रदेश हवाई सेवालाई प्रोत्साहन गर्न सरकारले अनुदान दिने गरी कार्यविधिको तयारी गरेको हो ।

तराईका अधिकांश विमानस्थलबाट रात्रि उडान गर्न सकिने गरी स्तरोन्नति भएकाले पनि अन्तरप्रदेश उडान सहज हुने नेपाल नागरिक उड्डयन प्राधिकरणको धारणा छ । प्राधिकरणका अनुसार हाल चन्द्रगढी, जनकपुर, विराटनगर, सिमरा, भैरहवा, नेपालगञ्ज र धनगढीमा रात्रि उडान गर्न सकिन्छ ।

सरकारले सबै प्रदेशबाट एकअर्का प्रदेशमा उडान गर्ने सम्बन्धमा समिति नै गठन गरेर काम अगाडि बढाएको छ । समितिले तयार पारेको प्रतिवेदनको आधारमा सेवाप्रदायकसँग छलफल गरेर निर्णयमा पुगिने पर्यटन मन्त्री योगेश भट्टराईले बताए । ‘व्यवसाय विस्तार गर्ने काम विमान कम्पनीहरूको हो । तर, शुरूमा हवाई सेवाप्रदायक कम्पनीलाई प्रोत्साहन गर्न केही समयका लागि अनुदान दिने सोच बनाएको हो,’ मन्त्री भट्टराईले भने । आन्तरिक पर्यटन प्रवर्द्धनका लागि पनि अन्तरप्रदेश उडान आवश्यक भएको र यसमा केन्द्र सरकार सहयोग गर्न सधैं तयार रहेको उनले बताए । 

श्री एयरलाइन्सले पनि प्रादेशिक उडानको लागि योजना बनाए पनि काठमाडौंबाटै उसले मागिरहेका स्थानमा उडान अनुमति नपाएकाले केही ढिला भइरहेको सो कम्पनीका प्रबन्धक अनिल मानन्धरले जानकारी दिए । ‘हामी पनि प्रादेशिक उडानमा सेवा विस्तार गर्ने सोचमा छौं । तर, हामीले अनुमति मागिरहेका स्थानमा अनुमति दिन प्राधिकरणको ढिलाइले यी सबै काम अवरुद्ध भएका छन्,’ उनले भने । 

विमान कम्पनीहरूले काठमाडौं बाहेकका विमानस्थललाई ‘बेस’ बनाएर उडान गर्नु सकारात्मक भएको र यसले अन्य विमानस्थललाई ‘बेस’ बनाउनुपर्ने प्राधिकरणको नीतिगत व्यवस्था कार्यान्वयनमा आउँदै गरेको नेपाल नागरिक उड्डयन प्राधिकरणका उपमहानिर्देशक राजकुमार क्षत्रीले बताए । 

आन्तरिक उडानका विमान कम्पनीहरूले क्षेत्रीय विमानस्थललाई ‘बेस’ बनाएर प्रादेशिक उडान गर्दा त्रिभुवन विमानस्थलको पार्किङ र हवाई ट्राफिकको समस्या न्यूनीकरण हुने उनको भनाइ छ । प्राधिकरणले वार्षिक बजेटमा पनि क्षेत्रीय विमानस्थल सुदृढीकरण गर्दै लैजाने योजना बनाएको छ । 

प्रतिक्रिया [0]