नेपाललाई कोरोनाविरुद्ध अपनाएका सबै खालका प्रविधि, औषधी र सूचना दिन चीन तयार

टीपी भुसाल

फागुन २७, काठमाडौं । चीनले कोरोनाभाइरसको संक्रमण नियन्त्रण र रोकथामको लागि अपनाएका सबै खालका प्रविधि, औषधी र सूचना नेपाललाई दिन तयार रहेको बताएको छ  । 

मन्त्रालयमा मंगलवार संस्कृति, पर्यटन तथा नागरिक उड्डयनमन्त्री योगेश भट्टराईसँग भएको भेटवार्तामा नेपालका लागि चीनका  राजदूत होउ यान्छीले चीनले अपनाएका सबै खालका प्रविधि, औषधी र सूचना नेपाललाई दिन चीन तयार रहेको बताइन् । 

भेटमा कोरोना भाइरसको संक्रमणले ल्याएको समस्या, यसको नियन्त्रण, रोकथाम उपाय र पूर्व तयारीको बारेमा मन्त्री भट्टराई र राजदूत यान्छीबीच कुराकानी भएको थियो ।

भेटका क्रममा उनले कोरोना भाइरसको संक्रमणबाट पीडित भएका ८० हजार ९०० चिनियाँ मध्ये ५९ हजार उपचारपछि घर फर्किएको जानकारी दिँदै  रोकथामको लागि चीनले गरेको प्रयास र अनुभव बताएकी थिइन् ।  

राजदूत यान्छीले नेपालमा कोरोना भाइरसको संक्रमण नफैलिने विश्वास व्यक्त गर्दै यदि नेपालमा समस्या भए नियन्त्रणको लागि चीनको पुरा सहयोग रहने बताइन् । उनले कोरोना भाइरसको संक्रमणबाट बच्न नेपालले अपनाएको पूर्व शर्तकता र तयारी राम्रो भएको पनि बताइन् ।

कोरोना भाइरसको संक्रमण रोकथामको लागि नेपालले सबै तयारी गरीरहेको जानकारी दिदै मन्त्री भट्टराईले अन्तरराष्ट्रिय विमानस्थलमा चेकजाँच, अस्पतालहरुमा वेडको व्यबस्थापन, आवश्यक क्वारेन्टाइनको व्यबस्था गरिएको बताए । 
 

उनले कोरोना भाइरसको संक्रमण रोकथामको निम्ति सरकारले भिडभाड हुने कार्यक्रम, सार्वजनिक स्थलहरुमा भेला नगर्न सचेत गराएको बताए । 

उनले कोरोना भाइरसको समस्याबाट बाहिर आउन चीनले गरेको प्रयासले चीन चाडै कोरोनामुक्त हुन लागेको भन्दै चीनको अनुभवबाट अन्य देशहरुले पनि सिक्न र सहयोग लिन सक्ने पनि बताए ।
 

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस