चैत ३, महेन्द्रनगर । जनप्रतिनिधिको रुपमा मात्रै नभई व्यवसायीक कृषकका रुपमा सक्रिय बनेका छन् –कञ्चनपुरको बेलौरी नगरपालिका–४ का वडाध्यक्ष अर्जुन ढकाल । उनी सार्वजनिक सेवामा सक्रिय मात्र छैनन्, व्यवसायीक कृषी पेसामा पनि संलग्न छन् ।
कार्यालय समय अघिपछि उनी माछा पोखरीमै भेटिन्छन् । कतिपय सेवाग्राही सेवा लिन माछा पोखरीसम्म्म पनि पुग्छन् । आफुलाई भेट्न आउने मान्छेलाई पनि उनी पोखरीमै बोलाउँछन् । फुर्सदको अधिकांस समय उनी माछा पोखरी हेरचाहमै बिताउँछन् । करीब डेढ बिघा क्षेत्रफलमा चार ओटा पोखरी निर्माण गरि वडाध्यक्ष ढकालले माछा पालन गरेका छन् ।
फुर्सदको समयको सदुपयोगसँगै व्यवसायिकताका लागि माछा पालन शुरु गरेको उनले बताए । ‘कार्यालय बाहेकको समय व्यवसायमै लगाएको छु’, उनले भने, ‘आफ्नै उद्यमले स्वरोजगार भइन्छ, अरुलाई रोजगारी पनि दिन सकियो ।’ उनले माछा पालन व्यवसायबाट करीब १० जनालाई रोजगारी दिएका छन् ।
करीब रू.१० लाख लगानीमा गत साउनबाट सञ्चालन गरेको पोखरीबाट पहिलो चरणको माछा उत्पादन भइसकेको छ । उनले भने, ‘यस वर्ष पाँच क्विन्टल माछा उत्पादन भएको छ, माछा पालनसँगै कुखुरा र बंगुर पालन पनि शुरु गर्दैछु, त्यसका लागि आवश्यक संरचना तयार भइरहेको छ ।’
त्यहाँको माछा स्थानीय बजार र धनगढीसम्म पुग्ने गरेको छ । बैखा, नैनी, रघु, सिल्भर, ग्रास लगायत छ जातका माछा उत्पादन हुने गरेकोमा हाल प्रतिकेजी रू.३७५ सम्ममा बिक्री हुने गरेको छ । बजारको माग अनुसार माछा उत्पादन गर्न नसकेकाले व्यवसायलाई थप विस्तार गर्ने योजना रहेको उनले बताए ।
माछा पालन व्यवसायबाट मात्रै वार्षिक रू. ५ लाख मुनाफा आर्जन गर्ने गर्न सकिने उनको भनाइ छ । साथै स्वदेशमै मेहनत गर्न सके राम्रो प्रतिफल मिल्ने भएकोले बेरोजगार युवालाई व्यवसायमा लाग्न उनको सुझाव छ ।