वायुसेवा कम्पनी भाडा पुनर्विचार गर्न तयार

निर्णयका लागि आज बैठक

मिलन विश्वकर्मा

काठमाडौं । आन्तरिक हवाई सेवामा अकस्मात् भाडा बढाएको भन्दै विरोध भएपछि वायु सेवा सञ्चालक तथा कम्पनीहरू भाडा पुनर्विचार गर्न तयार भएका छन् । हवाई यात्रु घटेसँगै भाडा घटाएका विमान कम्पनीले अहिले यात्रुको चाप बढेपछि पुरानै भाडा लिन शुरू गरेका थिए । 

हवाई भाडाको विषयमा गुनासाहरू आएपछि संस्कृति पर्यटन तथा नागरिक उडड्यन मन्त्री योगेश भट्टराईले शनिवार वायु सेवा सञ्चालकहरूसँग छलफल गरेका थिए । छलफलमा सञ्चालकहरू भाडादर घटाउन सहमत भएका हुन् ।

कोरोनाका कारण विदेशी पर्यटक नआएपछि वायुसेवा कम्पनीहरूले केही दिन अगाडिसम्म हवाई भाडा सस्तो बनाएका थिए । तर, हालै सरकारले कोरोना भाइरसको सम्भावित संक्रमण रोक्न लामो दूरीका सार्वजनिक यातायातमा रोक लगाउनुका साथै अत्यावश्यक सेवाप्रदायकबाहेक अन्य कार्यालय बन्द गर्ने निर्णय गरेपछि वायुसेवा कम्पनीहरूले हवाई भाडा हुन् । यसरी भाडा बढाएपछि सामाजिक सञ्जाललगायत माध्यमबाट त्यसको विरोध भइरहेको थियो । 

मन्त्री भट्टराईले वायुसेवा कम्पनीहरूलाई हालको परिस्थितिलाई दृष्टिगत गर्दै आन्तरिक ट्रंक रूटमा लिँदै आएको अधिकतम सीमाका २ ओटा स्ल्याबका भाडा हटाई सोभन्दा कमको भाडा लिन अनुरोध गरेका थिए । साथै, न्यूनतम सीमामा रहेका अन्य भाडा दरलाई समेत यथावत् कायम गर्न अनुरोध गरिएको थियो । 

मन्त्रीको अनुरोधलाई सकारात्मक रूपमा लिँदै वायुसेवा सञ्चालकहरूले तत्काल भाडा दर पुनर्विचार गर्ने प्रतिबद्धता व्यक्त गरेका छन् । यद्यपि, भाडादर कति घटाउने भन्ने विषयमा निर्णय भने भइसकेको छैन । यसका लागि आइतवार वायुसेवा सञ्चालक संघको बैठक बस्दै छ । उक्त बैठकमार्पmत नै कति भाडा घटाउने भनेर निर्णय गरिने बताइएको छ । 

संघका प्रवक्ता योगराज कडेलले हवाई भाडा घटाउने विषयमा मोटामोटी निर्णय भइसकेको बताए । ‘यद्यपि, कति घटाउने भनेर निर्णय भएको छैन । आइतवारको बैठकमार्फत त्यसलाई टुंगोमा पुर्‍याउँछौं,’ उनले भने, ‘यो विषम परिस्थितिमा भाडाको अधिकतम सीमा घटाउने योजना बनाएका छौं ।’ सरकारले चैत २१ गतेसम्म लामो दूरीको सवारीसाधन चल्न नदिने निर्णय गरेको छ । सो दिनसम्मका लागि मात्र हवाई भाडादर घटाउने संघको तयारी छ । 

यद्यपि, हवाई भाडा बढ्यो भनेर विरोध गर्नुपर्ने स्थिति नभएको कँडेल बताउँछन् । ‘न्यून, मध्यम र उच्च गरेर हवाई भाडाका ३ सीमा हुन्छन् । अहिले डिमान्ड उच्च भएका हुनाले १५ प्रतिशत टिकट मात्र उच्च सीमामा विक्री भएका हुन्,’ उनले भने, ‘हामीले सरकारले निर्धारण गरेको सीमामा नै टिकट विक्री गरेका हौं । यद्यपि, वर्तमान परिस्थितिलाई दृष्टिगत गर्दै हवाई भाडाको उच्च सीमालाई घटाउने भएका छौं ।’ 

प्रतिक्रिया [0]