साताका लागि सीमा नाकामा आवागमन बन्द 

टीपी भुसाल

काठमाडौं । सरकारले १ साताका लागि चीन र भारततर्फका सीमा नाकाबाट यात्रु आवागमन बन्द गर्ने निर्णय गरेको छ । आइतवार साँझ बसेको मन्त्रिपरिषद् बैठकले चैत १० गते सोमवारबाट लागू हुने गरी चीन र भारत दुवै देशतर्फका नाकाबाट हुने आवागमन १ साताका लागि बन्द गर्ने निर्णय गरेको हो । 

मन्त्रिपरिषद् निर्णय

• सोमवारबाट चीन र भारत दुवैतर्फका नाका १ साताका लागि बन्द
• अत्यावश्यक वस्तुको आयात र भण्डारणको व्यवस्था मिलाउने
• कोरोना संक्रमणको उपचारका लागि आवश्यक सामग्री एकद्वार प्रणालीबाट वितरण गरिने
• सशस्त्र प्रहरीको अस्पताल पनि कोरोना उपचार केन्द्र

नेपालसँग सिमाना जोडिएका भारतका प्रान्तहरूमा कोरोना संक्रमण देखिन थालेपछि नाका बन्द गर्न सरकारमाथि दबाब परेको थियो । मन्त्रिपरिषद् बैठकपछि बालुवाटारमा आयोजित पत्रकार सम्मेलनमा अर्थ तथा सञ्चारमन्त्री एवम् सरकारका प्रवक्ता डा. युवराज खतिवडाले दुई छिमेकी मुलुकका नाकाबाट यात्रु आवागमन बन्द गर्ने निर्णय गरेको जानकारी दिए । यात्रु आवागमन बन्द गरिए पनि मालवाहक सामानको ढुवानी भने नरोकिने उनले बताए । ‘एक देशमा भएको संक्रमण अर्को देशमा नफैलियोस् भनेर सोमवार बिहान १० बजेबाट १६ गतेसम्मका लागि छिमेकी देशका अन्तरराष्ट्रिय नाकाहरूबाट यात्रु आवागमन स्थगित गर्ने निर्णय गरिएको छ,’ उनले भने ।

मन्त्रिपरिषद् बैठकले कोरोनाको उपचारका लागि १० करोड रुपैयाँको कोष बनाउने निर्णय पनि गरेको छ । उक्त कोषमा मन्त्रीहरूले १ महीनाको तलब योगदान गर्ने र कोषका लागि रकम जुटाउन सार्वजनिक रूपमा आग्रह गर्ने निर्णय पनि गरेको डा. खतिवडाले जानकारी दिए । उद्योग वाणिज्य तथा आपूर्ति मन्त्रालयमार्फत नियमित बजार अनुगमन गर्ने, बजारको आपूर्ति व्यवस्थालाई सहज बनाउने र खाद्य वस्तुको अभाव हुन नदिन आयात र भण्डारणको व्यवस्था मिलाउने निर्णय गरिएको प्रवक्ता खतिवडाले जानकारी दिए । यस्तै उनले सार्वजनिक र सरकारी सेवा निरन्तर सञ्चालनमा रहने भएकाले सबै कर्मचारीले काममा यथावत् आउनुपर्ने स्पष्ट पारे । 

दोस्रोपटक मिर्गौला प्रत्यारोपणपछि प्रधानमन्त्री केपी शर्मा ओलीको अध्यक्षतामा आइतवार पहिलोपटक बालुवाटारमा मन्त्रिपरिषद् बैठक बसेको हो । मिर्गौला प्रत्यारोपणलगत्तै सार्क राष्ट्रका प्रमुखहरूको भिडियो कन्फरेन्समा पहिलोपटक सहभागी हुनुभएका प्रधानमन्त्री ओलीले गत शुक्रवार देशवासीका नाममा सम्बोधन गर्नुभएको थियो । 

सम्बोधनका क्रममा उहाँले सीमा नाकाबाट आवागमन गर्ने यात्रुको अनिवार्य स्वास्थ्य जाँच गर्ने बताउनुभएको थियो । तर, कोरोना भाइरसको जोखिम बढेसँगै छिमेकी मुलुक भारतमा कोरोनाको संक्रमण देखिन थालेपछि नाका नै बन्द गर्ने निर्णय गरिएको हो । नेपाल–भारत नाकामा आवतजावत कडाइ गरे पनि स्वदेश फर्किनेको संख्या बढेसँगै सरकारले सीमा नाका नै बन्द गर्ने निर्णय गरेको हो । 

बजारमा मास्क, स्यानिटाइजरको अभाव देखिएपछि त्यसको आन्तरिक उत्पादन हुन थालेको बताउँदै खतिवडाले छिमेकी मुलुक चीन र भारतसँग यस्ता सामग्रीको थप आपूर्तिका लागि पत्राचार गरेको जानकारी दिए । कोरोना संक्रमणको उपचारका लागि आवश्यक सामग्री एकद्वार प्रणालीबाट वितरण गरिने उनको भनाइ छ । 

‘चिकित्सक टोली पठाउन छिमेकी राष्ट्रले तयार छौं भने पनि आवश्यक परेमा मात्र बोलाउँछांै,’ उनले भने । कोरोना परीक्षणका लागि आवश्यक थप सामान पनि मगाउने उनले जानकारी दिए ।  

सरकारले चन्द्रागिरि नगरपालिकास्थित सशस्त्र प्रहरी अस्पताललाई कोरोना उपचार केन्द्र तोकेको छ । यसअघि धुलिखेल अस्पताल, बीपी कोइराला स्वास्थ्य विज्ञान अध्ययन प्रतिष्ठान धरान तथा वीर अस्पतालमा कोरोनाको परीक्षण गर्ने व्यवस्था गरेको थियो । कोरोना भाइरस नियन्त्रणका लागि वैदेशिक सहायता परिचालन गर्ने र अर्थ मन्त्रालयले त्यसको समन्वय गर्ने पनि मन्त्री खतिवडाले जानकारी दिए ।

प्रतिक्रिया [0]