अन्तरराष्ट्रिय बजारबाट स्वास्थ्य उपकरण ल्याउन निजी क्षेत्रलाई आह्वान

टीपी भुसाल

चैत ११, काठमाडौं  । सरकारले कोरोना भाइरस (कोभिड–१९) संक्रमण रोकथामका लागि आवश्यक स्वास्थ्य उपकरण अन्तरराष्ट्रिय बजारबाट ल्याउन निजी क्षेत्रलाई आह्वान गरेको छ । 

कोरोना भाइरस संक्रमण रोकथाम तथा नियन्त्रण उच्चस्तरीय समितिको मंगलवार बसेको बैठकले स्वास्थ्य उपकरण र सामग्रीको स्थानीय बजारमा आपूर्ति नभएकाले अन्तरराष्ट्रिय बजारबाट ल्याउनका लागि निजी क्षेत्रका व्यवसायीलाई आह्वान गर्ने निर्णय गरेको हो ।

नेपालमा कोरोनाको संक्रमण रोकथाम, नियन्त्रण र उपचारका लागि अत्यावश्यक औषधि, उपकरण तथा चिकित्सा सामग्रीहरु छिमेकी राष्ट्र चीन र भारतबाट तुरुन्त ल्याउने व्यवस्थाका लागि परराष्ट्र मन्त्रालयले समन्वय गर्ने निर्णय भएको अर्थमन्त्री तथा सूचना तथा प्रविधि मन्त्री एवं सरकारका प्रवक्ता युवराज खतिवडाले जानकारी दिए ।

यस्तै समितिले संक्रमणको रोकथाम नियन्त्रण र उपचारका लागि अत्यावश्यक हुने औषधि, उपकरण र उपचारका सामग्रीको शीघ्र आपूर्ति गर्न स्वास्थ्य सेवा विभागलाई मंगलवार नै पुनः सार्वजनिक सूचना जारी गनै निर्देशन दिएको छ ।

यस सम्बन्धि विषयमा सम्भावित आपूर्तिकर्तासँग बुधबार छलफल गरी त्यस्ता सामग्रीको आपूर्ति व्यवस्था मिलाइने सरकारका प्रवक्ता समेत रहेका डा खतिवडाले बताए ।

यस्तै सरकारले विपि कोइराला स्वास्थ्य विज्ञान प्रतिष्ठान धरान, पोखरा स्वास्थ्य विज्ञान प्रतिष्ठान,पोखरा र भेरी अस्पताल नेपालगञ्जका प्रयोगशालाहरुमा कोभिड–१९ को परिक्षणको कार्य यथाशीघ्र शुरु गर्ने र यसको लागि आवश्यक परीक्षण सामग्री र तालिमको व्यवस्थाका लागि  स्वास्थ्य तथा जनसंख्या मन्त्रालयलाई आग्रह गरेको छ ।

ती स्थानहरुमा प्रयोगशाला परिक्षण सेवा संचालन नभएसम्मका लागि विराटनगर र नेपालगञ्जबाट स्वाब संकलन गरी हवाइमार्गबाट काठमाडौं ल्याएर परिक्षण गरिने भएको छ ।

प्रतिक्रिया [0]