चीनतर्फका रसुवागढी र तातोपानी नाका खोल्ने सरकारको निर्णय

टीपी भुसाल

चैत १२, काठमाडौं ।सरकारले चीनतर्फका रसुवागढी र तातोपानी नाकाबाट मालसामान आयात निर्यात कार्य सुचारु गर्ने निर्णय गरेको छ ।

 स्वास्थ्य तथा जनसंख्या मन्त्रालय र कृषि तथा पशुपन्छी विकास मन्त्रालयको स्वास्थ्य सम्बन्धी प्रोटोकल पालना गरी गृह मन्त्रालय र सरकारले अर्थ मन्त्रालयले आवश्यक समन्वय गर्ने गरी नाका खोल्ने निर्णय गरेको  हो ।

उपप्रधानमन्त्री तथा रक्षामन्त्री ईश्वर पोखरेलको संयोजकत्वको कोरोना (कोभिड–१९) संक्रमण, रोकथाम तथा नियन्त्रण उच्चस्तरीय समन्वय समितिको बुधवार बसेको बैठकले प्रदेश र स्थानीय तहहरूले क्वारेन्टाइनको व्यवस्था गरी सञ्चालन गर्ने व्यवस्था मिलाउने निर्णय गरेको छ । यस्तै अति आवश्यक बैंकिङ सेवा गृह मन्त्रालय र अर्थ मन्त्रालयको समन्वयमा सुचारु गर्नेसमेत निर्णय पनि भएको छ ।

यस्तै गृह मन्त्रालय र संस्कृति, पर्यटन तथा नागरिक उड्डयन मन्त्रालयको स्वीकृतिमा नेपालका विभिन्न स्थानहरूमा रहेका विदेशी नागरिकहरूलाई हवाई उद्धार गरी काठमाडौं ल्याउने र  त्रिभुवन अन्तरराष्ट्रिय विमानस्थलबाट आफ्नो देश फर्कन सहजीकरण गर्ने निर्णय पनि गरेको छ ।

यसरी ल्याइएका विदेशीहरूलाई विमानस्थलबाटै आफ्नो देश फर्किजाने उडानको समय नमिलेको अवस्थामा सो अवधिभर विमानस्थल नजिकको होटेलमा निजहरूकै खर्चमा क्वारेन्टाइनमा राख्ने व्यवस्था मिलाइने निर्णय भएको छ । 

यस्तै स्थानीय तहहरूले आ–आफ्नो क्षेत्रभित्रका वडाहरूमा तेस्रो मुलुक र भारतबाट आएका व्यक्तिहरूको स्वास्थ्यसम्बन्धी विवरणसहितको अभिलेख प्रत्येक दिन अद्यावधिक गर्ने र स्थानीय स्वास्थ्य संयोजकले कोभिड –१९ को लक्षण देखिएका व्यक्तिहरूको विवरण प्रत्येक दिन प्रमुख जिल्ला अधिकारीलाई उपलब्ध गराउन पनि समितिले निर्देशन दिएको छ ।

प्रतिक्रिया [0]