प्राथमिक उत्पादनमुलक उद्योगहरु सञ्चालनमा

अन्य उद्योगहरू सञ्चालन गर्दै जाने उद्योग मन्त्रालयको तयारी

२०७६ चैत, २७

समाचार

टीपी भुसाल

चैत २८, काठमाडौं । सरकारले कोरोना भाइरस संक्रमणले सिर्जना गरेको संकटको अवस्थामा अत्यावश्यक दैनिक उपभोग्य वस्तुहरूको आपूर्ति असहज हुन नदिन उत्पादनमूलक उद्योगहरूलाई प्राथमिकीकरण गरी सञ्चालन गर्ने व्यवस्था मिलाइएको बताएको छ ।

पहिलो चरणमा दैनिक आवश्यकताका उपभोग्य खाद्यवस्तु उत्पादन गर्ने उद्योगहरू सञ्चालन भइरहको र दास्रो चरणमा संक्रमणको समग्र परिस्थिति हेरी विकास निर्माणका लागि आवश्यक कच्चापदार्थ उत्पादन गर्ने उद्योगहरू र अन्य उद्योगहरू सञ्चालन गर्दै जाने तयारी गरिएको उद्योग, वाणिज्य तथा आपूर्ति मन्त्रालयले जानकारी दिएको छ ।

लकडाउनको अवस्थामा मन्त्रालयले गरिरहेका कामहरुबारे जानकारी दिंदै मन्त्रालयले विभिन्न औद्योगिक कोरिडोरहरूमा रहेका खाद्यान्न उद्योग ४१ प्रतिशत, तेलहन उद्योग ६३ प्रतिशत, खानेपानी उद्योग ९० प्रतिशत, दुग्ध उद्योग ५० प्रतिशत, पशुपन्छीको दाना उद्योग ३३ प्रतिशत, औषधि उद्योग ७३ प्रतिशत र इंटा उद्योग ४८ प्रतिशत क्षमतामा चलेको बताएको छ ।

मन्त्रालयका अनुसार यस्तै मास्क, स्यानिटाइजर, व्यक्तिगत सुरक्षा कवच (पीपीई) जस्ता स्वास्थ्य सामग्री सम्भव भएसम्म मुलुक भित्रै उत्पादनगर्ने र मुलुक बाहिरबाट सकेसम्म छोटो प्रक्रियाबाट आयात गर्ने व्यवस्था मिलाइएकोे छ ।

हाल निजी क्षेत्रबाट मास्क, स्यानिटाइजर र (पीपीई) को आन्तरिक उत्पादन र आयात दुवै शुरु भइसकेको तथा नेपाल औषधि उद्योगले स्यानिटाइजरको उत्पादन शुरु मन्त्रालयले जारी गरेको विज्ञप्तिमा उल्लेख छ ।

हाल सरकारी र निजी क्षेत्रसँग १ लाख २५ हजार २९० मेट्रिक टन चामल, ७ हजार २९४ मेट्रिक टन चिनी, १ लाख ५८ हजार ९९० मेट्रिक टन नून, १६ हजार ८१ मेट्रिक टन गेडागुडी र दाल एवं १६ हजार ८६८ मेट्रिक टन तेल मौज्दात रहेको र उद्योगहरूसँग चामल ४ महीना, दलहन ३ महीना र तेलहन ३ महीनाको माग धान्नसक्ने मौज्दात रहेको मन्त्रालयले जानकारी दिएको छ ।

ग्यासको मागलाई सम्बोधन गर्न केही समयका लागि आधा सिलिण्डर ग्यास वितरण गर्ने व्यवस्था मिलाइएकोमा चैत ३० गतेदेखि पूरै सिलिण्डर ग्यास विक्री वितरण हुने व्यवस्था मिलाइएको छ ।

लकडाउन शुरु भएपछिको १७ दिनमा ३७ हजार ३३४ मेट्रिक टन खाद्यान्न, १४ हजार ५४ मेट्रिक टन गेडागुडी तथा दलहन, २१ हजार ६ २६ मेट्रिक टन तरकारी, ५ हजार ९६२ मेट्रिक टन फलफूल, ८० मेट्रिक टन दुग्धजन्य पदार्थ, रू.१० करोड ८७ लाख ७ हजार बराबरको औषधिको कच्चापदार्थ र रू.५६ करोड ९७ लाख २७ हजार बराबरको तयारी औषधि आयात भएको मन्त्रालयले जानकारी दिएको छ ।