म्याग्दीमा डेंगी र स्क्रब्टाइपस संक्रमित बिरामी फेला परे

२०७७ बैशाख, १०

गण्डकी प्रदेश

म्याग्दी १० बैशाख, विश्व नै कोरोना भाइरस (कोभिड १९) को संक्रमणबाट आक्रान्त भइरहेको अवस्थामा हिमाली जिल्ला म्याग्दीमा भने डेंगी र स्क्रब्टाइपसको संक्रमित विरामी देखिएका छन् । उच्च ज्वरो आउने, शरिरमा जाडो हुने र जोर्नी दुख्न थालेपछि चेकजाँच गर्ने क्रममा यहाँका एक युवामा डेंगीको संक्रमण भेटिएको बेनी अस्पताल म्याग्दीले बताएको छ ।

मंगला गाउँपालिका–५, अर्मनका ३२ वर्षीय युवामा उच्च ज्वरो आउने, जोर्नी दुख्ने तथा जाडो हुने जस्ता लक्षणहरू देखिएपछि ल्याब परीक्षण गर्दा डेंगुरोग र स्क्रब्टाइपसको संक्रमण पोजिटिभ देखिएको बेनी अस्पतालका मेडिकल अधिकृत डा. अजय गौतमले बताए । १०४ डिग्री फरेनहाइटसम्म ज्वरो आएको ती युवाको अहिले चिकित्सकको निगरानीमा उपचार भइरहेको र उनको स्वास्थ्य अवस्था सामान्य रहेको डा. गौतमले बताए ।
गर्मी मौसम बढ्दै जादा म्याग्दीमा डेंगीको पहिलो बिरामी भेटिएको हो । एडिज एजिप्टाई नामको पोथी लामखुट्टेले एकबाट अर्को व्यक्तिलाई टोकेर डेंगीको संक्रमण हुन्छ ।

गतवर्ष म्याग्दीमा १२ जनामा डेंगीरोग तथा एक महीलामा स्क्रब्टाइपसको संक्रमण भएको थियो । दुवै रोगबाट उच्च ज्वरो आउने लगायत लक्षण देखिने भएकाले पनि अहिलेको कोरोनाको आशंकाले त्रसित हुने गरेका छन् । डेंगी र स्क्रब्टाइपस एक व्यक्तिबाट अर्कोमा सजिलै सर्ने भएकाले सतर्कता अपनाउनुपर्ने चिकित्सकको सुझाव छ ।