थप एकसाता लकडाउन थप्न कार्यदलको सिफारिस 

टीपी भुसाल

वैशाख १३, काठमाडौं । कोरोना भाइरस (कोभिड–१९) संक्रमण, रोकथाम तथा नियन्त्रण उच्चस्तरीय समन्वय समिति अन्तर्गतको कार्यदलले लकडाउनको समय थप एकसाता बढाउन सिफारिस गरेको छ । 

मुख्यसचिव  लोकदर्शन रेग्मीको नेतृत्वमा शनिवार सिंहदरबारमा बसेकोे कार्यदलको  बैठकले लकडाउन एक साता थप गर्न उच्चस्तरिय समितिलाई सिफारिस गरेको हो ।लकडाउनको स्वरुप तयार गर्न मुख्यसचिव नेतृत्वको कार्यदललाई उच्चस्तरीय समितिलिे जिम्मा दिइएको थियो ।

उपप्रधान एवं रक्षामन्त्री एवं कोभिड–१९ संक्रमण, रोकथाम तथा नियन्त्रण उच्चस्तरीय समन्वय समितिका संयोजक ईश्वर पोखरेलले शनिवार नै कार्यदलको सिफारिश प्रधानमन्त्री केपी शर्मा ओलीलाई समक्ष पेश गरेका छन् ।

 कार्यदलले एक साता लकडाउन थप्ने र ठाउँ हेरेर खुकुलो गर्न सकिने सुझावसमेत दिएको छ । यस विषयमा आइतबार बस्ने मन्त्रिपरिषदको बैठकले औपचारिक निर्णय गर्नेछ । 

लकडाउन थप गर्ने या मोडालिटी परिवर्तन के गर्ने भन्ने बारेको निर्णय शनिवार दिउँसो उच्च स्तरिय समितिले गर्ने भनिए पनि त्यसको मोडालिटी बनाउने जिम्मा कार्यदललाई दिइएको थियो । 

समितिमा विभिन्न पाटोबाट लकडाउनको विश्लेषण भएको र मन्त्रिपरिषद्को आगामी बैठकबाट लकडाउनबारे निर्णय हुने प्रधानमन्त्री कार्यालयका सचिव नारायण विडारीले जानकारी दिएका थिए । 

वैशाख २ गते बसेको मन्त्रिपरिषद् बैठकले कोरोना भाइरसको विश्वव्यापी संक्रमणलाई ध्यान दिँदै जारी गरेको लकडाउनको समय अवधि १२ दिन लम्ब्याउँदै वैशाख १५ गतेसम्मका लागि निरन्तरता दिने निर्णय गरेको थियो ।

कोरोना भाइरस फैलिन नदिन सरकारले ११ चैतदेखि पहिलो पटक लकडाउन लागू गरेको थियो । त्यसपछि दुई पटक अवधि बढाएर ३ वैशाखसम्मलाई लकडाउन लम्ब्याउने निर्णय गरिएको थियो ।

नेपालमा पनि कोरोना संक्रमितको संख्या बढ्दै जाँदा सरकारले लक डाउनको समयअवधि पनि थप्दै लगेको छ । 

नेपालमा शनिवारसम्म कोरोना संक्रमितको संख्या ४९ रहेको छ । १२ जना  निको भएर घर गएका छन्  भने ८७ जना आईसोलेशनमा रहेका छन् ।

प्रतिक्रिया [0]