लकडाउनमा त्रिभुवन अन्तरराष्ट्रिय विमानस्थलमा निरन्तर निर्माण कार्य

टीपी भुसाल

वैशाख, १४ काठमाडौं  । त्रिभुवन अन्तरराष्ट्रिय विमानस्थलमा १ हजार ३०० यात्रु क्षमताको नयाँ प्रस्थान हल निर्माण भएको छ । 

लकडाउनको समयलाई सदुपयोग गर्दै विमानस्थलमा धावन मार्ग विस्तार, नयाँ प्रस्थान कक्ष निर्माण, पेरिमिटर सडक लगायतका भौतिक पूर्वाधारका काम भइरहेको नेपाल नागरिक उड्डयन प्राधिकरण (क्यान) ले जानकारी दिएको छ ।

 रू.८५ करोडको लागतमा यी सबैकाम सम्पन्न हुने प्राधिकरणका महानिर्देशक राजन पोखरेलले जानकारी दिए ।

यस अन्तर्गत त्रिभुवन अन्तरराष्ट्रिय विमानस्थलको धावनमागको लम्बाई ३०० मिटर बढाइएको छ । यस अघि  विमास्थलको धावन मार्गको लम्बाई ३ हजार ५० मिटर लम्बाई थियो । हवाई यातायात क्षमता अभिवृद्धि आयोजना अन्तर्गत यी कामहरु भएको र यसले विमानस्थलको क्षमतामा वृद्धि भएको महानिर्देशक पोखरेलले बताए ।
 

यसबाट क्षमता बढाउन एवं अवतरण र उडानमा थप सुरक्षा प्रत्याभूत गर्न सहयोग पुग्ने पोखरेलले बताए । यो आयोजना अन्तर्गतको काम स २०२० को जुन महीनामा सम्पन्न गर्नुपर्ने समय रहेपनि अधिकाँश क्षेत्रको मोटामोटी काम सकिएको प्राधिकरणले जानकारी दिएको छ । 

‘यी कामहरु सन् २०२० जुन सम्ममा सक्नु पर्ने हो, लकडाउनले विमानस्थलमा आवात जावत नभएको र श्रमिकलाई त्यहीं राखेर काम गर्दा धेरै कामहरु छिट्टै सम्पन्न भएका छन्, हामीले लकडाउनको समयलाई विमानस्थलको पूर्वाधार विकासमा लगाएका छौं’, उनले भने । कपिय कच्चा सामग्रीको आपूर्तिमा समस्या आएपनि समन्वय गरेर काममा बाधा पुग्न नदिएको उनले बताए ।

 कोरोना संक्रमणको जोखिम बढेपछि सरकारले जारी गरेको लकडाउनमा सामाजिक दूरी कायम गर्दै निर्माणको काम जारी रहेको महानिर्देशक पोखरेलले बताए । उनले विमानस्थलभित्रै क्याम्प बनाएर खाने, बस्ने र स्वास्थ्य जाँचको व्यवस्था गरेर काम गरिएको बताए ।

 प्राधिकरणले गौतमबुद्ध अन्तरराष्ट्रिय विमानस्थल र पोखरा विमानस्थलमा पनि आवश्यक सुरक्षा प्रबन्ध मिलाएर निर्माण कार्य जारी राखेको छ ।

विमानस्थलमा गत वर्ष नै एउटा ‘रिमोट पार्किङ वे’ निर्माण गरी सञ्चालनमा आइसकेको छ । भने अर्को अन्तिम चरणमा पुगेको छ । अन्तरराष्ट्रिय टर्मिनलमा जम्मा ९ ओटा विमानहरु मात्र पार्किङ क्षमता रहेकोमा रिमोट पार्किङ वेको निर्माणले यसको पार्किङ क्षमता ११ पुगेको छ । दक्षिणतर्फ बनिरहको पार्किङ वेमा थप २ देखि ३ ओटा विमान पार्किङ गर्न सकिने छ । 

यसअघि गत वर्ष असारमा झण्डै ४० वर्षभन्दा बढी समयसम्म सामान्य मर्मत गरेर सञ्चालन गरिएको त्रिभुवन विमानस्थलको धावनमार्गमा पुरै कालोपत्र गरिएको थियो । चीनको सरकारी कम्पनी चाइना नेशनल एग्रो टेक्नोलोजी इन्टरनेशनल इञ्निीयरिङले रू.४ अर्ब २७ करोडमा रनवेको स्तरोन्नति सम्पन्न गरेका थियो ।

यी सबै पूर्वाधार बनिसक्दा विमानस्थलले नयाँ स्वरुप पाउने र यसको कार्य क्षमता तथा स्तर दुवै बढ्ने प्राधिरणले विश्वास लिएको छ । यी आयोजनासँगै विमानस्थललाई बुटिक विमानस्थलको रुपमा रुपान्तरण गर्ने काम पनि निरन्तर चलिरहेको विमानस्थल कार्यालयले जानकारी दिएको छ ।   

प्रतिक्रिया [0]