बस्तीमाथि सडक खन्दा सिंगो गाउँ जोखिममा

ठूल्ठूला ढुंगा बर्सिंदा स्थानीय त्रसित

ध्रुवसागर शर्मा

वैशाख २९, म्याग्दी । गाउँको शिरानबाट अव्यवस्थित रूपमा एक्स्कभेटरको प्रयोग गरी सडक निर्माण गर्दा म्याग्दीको मंगला गाउँपालिका–५ अर्मन गाउँ उच्च जोखिममा परेको छ । अर्मन गाउँकोे सिरानीबाट स्थानीयको सहमतिविना सडक विस्तार गरेपछि तत्काल १२ घरधुरी उच्च जोखिममा रहेको स्थानीय तुलसी सुवेदीले बताइन् । 

किमचौर–कमिरे हुँदै धारा जोड्ने सडकले तलको अर्मन गाउँ पहिरोको जोखिममा परेको हो । ‘सिंगो अर्मन बस्ती नै पहिरोको चपेटामा परेकोे छ, लगातारको वर्षाले कुनै पनि बेला विस्थापित हुनुपर्ने अवस्था आएको छ,’ सुवेदीले भनिन् ।

ठूल्ठूला ढुंगा बस्नी नजिक आइपुगेकाले तत्काल व्यवस्थापन नगरे स्थानीय घनश्याम सुवेदी, दण्डपाणि सुवेदी, लक्ष्मी सुवेदी, बुद्धिप्रसाद कँडेल लगायत १२ परिवार विस्थापितको खतरा रहेको भन्दै स्थानीयले जनप्रतिनिधिलाई ध्यानार्कषण गराएका छन् ।

सडक विस्तारले शिशु कल्याण मावि नै जोखिममा परेको भन्दै लगातारको वर्षाले कुनै पनि बेला असर गर्नेतर्फ वडा अध्यक्ष भूपेन्द्रबहादुर खत्रीको समेत ध्यानाकर्षण गराइएको स्थानीयको भनाइ छ । 

‘वडाध्यक्ष गाउँमै हुनुहुन्छ, हामी विकास विरोधी होइनौं, गाउँ नै विस्तापित गर्ने अवस्थामा चुप लागेर बस्न सक्दैनौं,’ प्रेमबहादुर रोकाले भने । भिरालो जमिनमा बस्तीमाथिबाट डोजरले सडक खनिएकाले पनि जमिन हल्लिएर पानी पर्नासाथ पहिरो खस्न थालेको उनको भनाइ छ । 

करीब ८० लाख लागत अनुमान गरिएको सडक विस्तारको क्रममा कडा चट्टान पन्छाउनुपर्ने भएकाले समेत तत्काल व्यवस्थापन नगरे अर्मन गाउँका करीब ५० घरधुरी बाढीपहिरोको जोखिममा बस्नुपर्ने स्थानीयको भनाइ छ ।

स्थानीयले भौगोलिक र वातावरणीय मूल्यांकनविना नै धमाधम बस्तीमाथिबाट सडक निर्माण गरेको आरोप लगाएका छन् । ‘सानो पानी आउँदा पनि पहिरो खस्न थालेको छ, वर्खाको समयमा रातभर जागा बस्नुपर्छ,’ धनमाया सुवेदी गौतमले भनिन् । डोजरले खनिएको कच्ची सडकमा स्थानीयले तत्काल रोक्नुपर्ने माग गरेका छन् ।

गाउँमाथिबाट ठूला ढुंगा खस्ने थालेको अवस्थामा बस्तीलाई सुरक्षित बनाउन ढुंगा फुटाउन समेत स्थानीयले माग गरेका छन् । यता, वडाध्यक्ष खत्रीले निर्माणको कामलाई व्यवस्थित रूपमा अगाडि बनाउने आश्वासन दिएका छन् । 
 

प्रतिक्रिया [0]