त्रिभुवन विमानस्थलको धावनमार्ग आइकाओ मापदण्डको बन्यो

टीपी भुसाल

काठमाडौं । त्रिभुवन अन्तरराष्ट्रिय विमानस्थलको धावनमार्ग अन्तरराष्ट्रिय नागरिक उड्डयन प्राधिकरण (आइकाओ) मापदण्डअनुसार बनेको छ । लकडाउन अवधिमा विमानस्थलको दक्षिण कोटेश्वर क्षेत्र (रनवे जिरो–टु) तर्फ ३ सय मीटर धावनमार्ग विस्तार गरिएको हो । यससँगै विमानस्थलको धावनमार्गको कुल लम्बाइ ३ हजार ३०० मीटर पुगेको छ ।

धावनमार्ग विस्तारपछि अन्तरराष्ट्रिय उडानका जहाजलाई उडान तथा अवतरणका लागि थप सहज हुने नेपाल नागरिक उड्डयन प्राधिकरणले बताएको छ । यसअघि गतवर्ष असारमा प्राधिकरणले करीब ४० वर्षभन्दा बढी समयसम्म सामान्य मर्मत गरेर सञ्चालन गरिएको धावनमार्गमा पुरानो पिच उप्काएर नयाँ हाल्ने काम सम्पन्न गरेको थियो ।

धावनमार्ग विस्तारको कामले विमानस्थल अन्तरराष्ट्रिय मापदण्डको बनेको विमानस्थल कार्यालयका महाप्रबन्धक देवेन्द्र केसीले बताए । ‘हामीलाई अन्तरराष्ट्रिय नियामक निकाय आइकाओले पटकपटक धावनमार्ग कम भएको भन्दै आएको थियो । तर, विस्तार गर्न विमानस्थल पूर्णरूपमा बन्द गर्नुपर्ने अवस्था थियो । ‘कोरोना महामारीको समयमा उडान बन्द भएको समयलाई सदुपयोग गरी यो काम हामीले सम्पन्न गरेका छौं,’ उनले भने । कोरोना महामारी नियन्त्रणका लागि सरकारले गत चैत ११ देखि लागू गरेको बन्दाबन्दीकै अवस्थामा धावनमार्ग विस्तारको काम सकिएको केसीको भनाइ छ ।

गतवर्ष गरिएको धावनमार्गको रिह्याव र अहिले भएको विस्तारले विमानस्थलको धावनमार्ग नयाँ मात्र बनेको नभई विमानस्थल सञ्चालनको क्षमतासमेत बढेको प्राधिकरणको दाबी छ ।
प्राधिकरणअन्तर्गतको हवाई यातायात क्षमता अभिवृद्धि आयोजनाअन्तर्गत रू. ८४ करोडको लागतमा धावनमार्ग विस्तार सम्पन्न भएको हो । आयोजना निर्माणका लागि कालिका टुन्डी जेभी कन्ट्याक्टर र ए वान विल्डर्स सबकन्ट्याक्टर छनोट भएका थिए । चैत ११ देखि जारी बन्दाबन्दीसँगै आन्तरिक र अन्तरराष्ट्रिय दुवैतर्पmका नियमित उडान अवतरणमा प्रतिबन्ध गरिएपछि बेलुका ६ देखि बिहान ६ बजेसम्म १२ घण्टा धावनमार्ग विस्तारको काम गरिएको थियो । ‘३ सय मीटर लामो धावनमार्ग विस्तार गरी कालोपत्र गर्ने काम सकिएको छ । अब ‘रनवे लाइट र एप्रोच लाइट’ राख्ने काम मात्रै बाँकी छ । रनवे लाइट विदेशबाट ल्याउनुपर्ने तर लकडाउनका कारण त्यो आउन ढिलाइ भएकाले केही समय लाग्न सक्छ,’ आयोजनाका सूचना अधिकारी दीपेन्द्र श्रेष्ठले भने ।

प्रतिक्रिया [0]