लकडाउनको मोडल परिवर्तन गर्नुपर्नेमा निजी क्षेत्रको जोड 

रेड, ग्रिन र एल्लो जोन गरेर लकडाउन खुकुलो बनाउन सुझाव 

टीपी भुसाल

जेठ २०, काठमाडौं  । कोरोना भाइरस ( कोभिड– १९) को संक्रमण रोक्न भन्दै सरकारले ७१ दिनदेखि लागू गरेकोे लकडाउनको कारण व्यवसाय चौपट भएको भन्दै व्यवसायीहरुले लकडाउनको स्वरुप (मोडल) परिवर्तन गर्न सरकारलाई सुझाव दिएका छन् । 

उनीहरुले जोखिमको स्तर हेरेर क्षेत्रगत रुपमा समय समेतको व्यवस्थापन गरी लकडाउनको स्परुप परिवर्तन आग्रह गरेका छन् ।

कोभिड– १९ रोकथाम तथा नियन्त्रण उच्चस्तरीय समितिका संयोजक तथा उपप्रधान तथा रक्षा मन्त्री ईश्वर पोखरेलसँग सिंहदरबारमा मंगलवार निजी क्षेत्रका सबै पेशा व्यवसायका छाता संगठनका प्रतिनिधिले छलफल गर्दै लकडाउनको मोडल परिर्वतन गर्ने सुझाव दिएका हुन् ।  

छलफलमा सहभागी संगठनका प्रतिनिधिले अर्थतन्त्र चलायमान बनाउनेबारे तत्काल नसोच्ने हो भने कोरोना भाइरसले निम्त्याउने समस्या भन्दा भोकमरीको समस्या विकराल हुने भन्दै उद्योग सञ्चालनको व्यवस्था मिलाउन ध्यानाकर्षण गराएका थिए ।

 व्यवसायीहरले लकडाउन लम्बिँदै जाँदा उत्पादन, बजारीकरणमा सहभागी मजदूर, लगानीकर्ता सबै प्रभावित हुने भन्दै व्यवसायीले लकडाउन खुकुलो पारेर क्षेत्रगत वर्गीकरण गरी उद्योग खोल्ने वातावरण मिलाउनु पर्ने बताए । 

सबैतिर एकैनासले लकडाउन गर्दा अर्थतन्त्रको अवस्था नाजुक बन्दै गइरहेकोले जोखिम हेरेर रेड, ग्रिन र एल्लो जोन गरेर लकडाउन खुकुलो बनाउन आग्रह गरिएको उद्योग वाणिज्य महासंघकी अध्यक्ष भवानी राणाले जानकारी दिइन् ।

त्यसैगरी चेम्बर अफ कमर्शका अध्यक्ष राजेश काजी श्रेष्ठले जोखिम मुल्यांकन गरी सुरक्षित क्षेत्र र समय छुट्याएर लडाउन खुल्ला गरि उद्योगधन्दा संञ्चालनको व्यवस्था मिलाउन आफुहरुले सरकारसंग आग्रह गरेको बताए ।

यातायात व्यवसायी महासंघका महासचिव सरोज सिटौलाले सामाजिक दुरी कायम गरि सार्वजनिक यातायातका साधन पनि संञ्चालन गर्नु पर्ने बताए ।

नेपाल निर्यात व्ंयवसायी महासघका महासचिव तथा पश्मिना उद्योग संघका अध्यक्ष दुर्गाविक्रम थापाले यसरी नै लकडाउनलाई निरन्तरता दिएर मात्र समस्या समाधान नहुने भन्दै व्यवसाय सञ्चालन गर्ने वातावरण बनाउन सुझाव दिएको जानकारी दिए । 

वैशाख २४ गते बसेको मन्त्रिपरिषद् बैठकले लकडाउनको अवधिमा शर्तसहित अत्यावश्यक र अन्य उद्योगहरू सुरक्षा मापदण्ड अपनाई सञ्चालन गर्न दिने निर्णय गरेको थियो । 

विभिन्न ४४ प्रकारका उद्योग संञ्चालन गर्न दिने निर्णय पछि केही उद्योगहरु चलेपनि उद्योगको लागि आवश्यक पास उपलब्ध नहुनु, राजधानी बाहिर गएका कामदार फर्कने व्यवस्थाको साथै उत्पादन विक्रीका लागि बजार  नहुनाले समस्या सृजना भएको व्यवसायिको धारणा छ ।

 व्यवसायीहरुको सुझावपछि समितिका संयोजक तथा उपप्रधानमन्त्री ईश्वर पोखरेलले स्वास्थ्य विज्ञ लगायत विभिन्न निकायका प्रतिनिधिसँग छलफल गरि आवश्यक निर्णय लिने आवश्वासन दिएको निर्यात व्ंयवसायी महासघका महासचिव दुर्गाविक्रम थापाले बताए । 
 

प्रतिक्रिया [0]