लकडाउन खुकुलो पार्ने मोडालिटी अझै तय भएन 

मोडालिटी तय गर्न उच्चस्तरिय समितिको बैठक पुन : बस्ने  

टीपी भुसाल

जेठ २४, काठमाडौं  । लकडाउन खुकुलो पार्ने मोडालिटी तय गर्न शनिवार बसेको कोभिड–१९ रोकथाम तथा नियन्त्रण उच्चस्तरीय समितिको बैठक विना निश्कर्ष टुंगिएको छ । बिहीवार बसेको मन्त्रिपरिषद् बैठकले दुई दिनभित्र लकडाउन खुकुलो पार्ने गरी मोडालिटी पेस गर्न उच्चस्तरिय समितिलाई निर्देशन दिएको थियो ।

मोडालिटीका बारेमा बैठकमा छलफल भएपनि टुंगोमा पुग्न सनकिएको प्रधानमन्त्री तथा मन्त्रिपरिषद् कार्यालयका सचिव नारायणप्रसाद बिडारीले जानकारी दिए । 

लामो समयसम्म लकडाउन जारी राख्दा व्यवसायीले अवज्ञा गर्न थालेपछि बुधवार प्रधानमन्त्रीले लकडाउनको मोडालिटी र भावी कार्यदिशाका बारेमा विज्ञहरुसँग छलफल गर्नुभएको थियो । यस्तै बिहीवारको मन्त्रिपरिषद् बैठकबाट मोडालिटी तय गर्ने जिम्मेवारी उक्त समितिलाई दिइएको थियो । 

‘बैठकमा लकडाउनका बीच पनि आर्थिक क्रियाकलापलाई कसरी चलायमान बनाउने भन्ने बारेमा छलफल भयो, तर यसमा थप छलफल आवश्यक भएकोले उच्चस्तरिय समितिको बैठक फेरि बसेर निर्णयमा पुग्ने भनिएको छ’, उनले भने । 

उनका अनुसार बन्दाबन्दिको अवस्थामा पनि आर्थिक क्रियाकलाप, अस्पताल, विकास निर्माणका काम र आधारभूत आवश्यक्ताका कुराहरुलाई चरणबद्ध रुपमा सहज बनाउनेतर्फ समितिमा छलफल भएको छ । 

स्वास्थ्य मन्त्रालयले बनाएको स्वास्थ्य सुरक्षा निर्देशका र गृह मन्त्रालयले बनाएको अन्य निर्देशिकाको अनुशरण गर्दै लकडाउनलाई सहज बनाउनेतर्फ नै छलफल केन्द्रित भएको उनले बताए । 
गत चैत ११ गतेदेखि देशभर लागू लकडाउन पटक–पटक म्याद थप्दै पछिल्लो समय आगामी जेठ ३२ गतेसम्म लम्ब्याइको छ । जसको कारण व्यवसायीहरुले लकडाउनको मोडालिटी परिवर्तन गर्न सरकारलाई सुझाव सहित दबाब पनि दिदैं आएका छन् । सोही अनुसार सरकार लकडाउनको नयाँ मोडालिटी परिवर्तन गर्न जुटेको छ । 

प्रतिक्रिया [0]